အိုကံ

စည်းစိမ်ဥစ္စာတွေ၊ အခြွေအရံတွေဆိုတာ ကံရဲ့ အကျိုးပေးတွေဗျ။ ကံတွေ မဟုတ်ဘူး။ ကံဆိုတာ ကိုယ်အားထုတ်တဲ့ ဒါန၊သီလ၊ ဘာဝနာတွေကို ခေါ်တာ။
(နတ်မောက်မြို့နယ်၊ ဥယျဉ်တောင်ကျောင်းဆရာတော်)

အငယ်က မိမိတို့နေတဲ့ ဘုန်းကြီးကျောင်းမှာ ကပ္ပိယကြီးနှစ်ယောက်ရှိတယ်။ ဦးဖိုးငယ် နဲ့ ဦးသာမှတ် တဲ့၊ ဦးဖိုးငယ်က မျက်စိမမြင်တဲ့ ဒုက္ခိတကြီး။ ဦးသာမှတ် ကတော့ အသက်အရွယ်အလျောက် အိုမင်းတာကလွဲလို့ အားလုံး အင်္ဂါစုံလင်ပါတယ်။ အသက်ကြီးလာတော့ ရွာထဲမှာ ဆူဆူညံညံမနေလိုတာနဲ့ ဘုန်းကြီးကျောင်းမှာ ကပ္ပိယ အဖြစ်လာနေတာ။ သူက ရွာမှာ အချမ်းသာဆုံးဖြစ်တဲ့ ဦးသာမြတ် ရဲ့ အစ်ကိုအရင်းပါ။

ဒါပေမယ့် ညီအစ်ကိုချင်း တယ်ပြီး သဘောထားမတိုက်ဆိုင်ကြဘူး။ မခေါ်မပြောရယ် လို့တော့ မဟုတ်ပါဘူး။ စရိုက်ချင်းမတူ ညီကြတော့ ဖာသိဖာသာပဲ နေကြတာပါ။
သူတို့ ညီအစ်ကိုဟာ မိဘမျိုးရိုးကတော့ မရှိမရှား ဆိုတဲ့ အတန်းအစားထဲကပါပဲ၊ နောက်တော့ ခေတ်ကာလအလျောက် ရှာတတ် ဖွေတတ် ကြံဖန်တတ်တဲ့ ဦးသာမြတ် က တစ်ရွာလုံးမှာ အချမ်းသာဆုံးဖြစ်သွားပြီး ဦးသာမှတ် ကတော့ သာမန်အဆင့်ပဲ။ အို လာတော့လည်း သားသမီးတွေ သူ့အိုးသူ အိမ် ခွဲသွားကြတာ အဘိုးကြီး အမယ်ကြီး နဲ့ မိတဆိုးမြေးကလေးတွေ နဲ့ နည်းနည်းတော့ ကသီလင်တ ရှိတာပေါ့။ မြေးကလေးတွေ ရှင်လူထွက်ပြီး ဆောင်သူလုပ်ကိုင်နိုင်ကြတော့ သူက အိမ်မှာမနေတော့ဘဲ ဘုန်းကြီး ကျောင်းမှာ ကပ္ပိယ လုပ်နေတာ။
ကပ္ပိယကြီးနှစ်ယောက်မှာ မျက်စိမမြင်တဲ့ ဦးဖိုးငယ်က အသက်နည်းနည်း ငယ် တယ်။ (၇၀) ကျော်ကျော်လေးပေါ့။ သူက မျက်စိသာမမြင်တယ်။ ကျောင်းဝိုင်းထဲမှာ ပေါင်းမြက်ရှင်းတဲ့အလုပ်ကျတော့ အတော်ကို သေသပ်တယ်။ လက်တစ်ဖက်ကိုင် တူရွှင်းပြားအရိုးတိုလေးနဲ့ မြက်တွေကို ထိုးထိုးပြီးလက်နဲ့ စမ်းစမ်း ပုံထားတာ။ အကွက် ကိုစေ့လို့။ အကွက်ကျော်ပြီး ပေါင်းမြက်တွေ ကွက်ကြားကျန်ရစ်တယ်လို့ကို မရှိဘူး။ ထိုးပြီး သား မြက်ပင်တွေကိုလည်း လက်ကလေးနဲ့ သဲ့သဲ့ပြီး သပ်သပ်ရပ်ရပ်ပုံထားတာ ညီနေတာပဲ။ အမှိုက်စွန့်တဲ့ အခါတော့ ကျောင်းသား ကိုရင်တွေ စွန့်ပေးကြတယ်။ အငယ်ကတည်းက ဒီဘုန်းကြီးကျောင်းမှာပဲ   နေခဲံ့တာဆိုတော့ ကျောင်းဝိုင်းတစ်ဝိုင်းလုံး ဘယ်နားမှာ ဘာရှိတယ်ဆိုတာ အကုန်မှတ်မိနေတော့ အိမ်သာတို့၊ ရေချိုးကန်တို့ ကိုလည်း ဘယ်သူမှ လိုက်ပို့စရာမလိုဘူး။ တောင်ဝှေးကလေးနဲ့ ထောက်စမ်းပြီး သူဟာသူ သွားတာပဲ။
မနက် အရုဏ်တက်ခါနီး ကျောင်းသားကိုရင်တွေဆို ကပ္ပိယကြီးတွေ နိုးကြ ပြီး ကျောင်းသား ကိုရင်တွေ ဘုရားဝတ်တက်ဖို့နဲ့ ရွာထဲကို ဆွမ်းချက်နိုးဖို့ ကုလားတက် တုံးခေါက်တာ၊ ရေနွေးကျိုတာ စတဲ့ ဗာဟိရ အလုပ်တွေကို ကပ္ပိယကြီးနှစ်ယောက်က လုပ်ကိုင်ပေးကြတာဆိုတော့ ကျောင်းသားကိုရင်တွေကလည်း ကြည်ဖြူစောင့်ရှောက် ကြတယ်။ လသာတဲ့ ညတွေမှာဆို ကပ္ပိယကြီးတွေနဲ့ ရှေးဟောင်းနှောင်းဖြစ်တွေ၊ ပုံပြင်တွေ ပြောပြတာကို ၀ိုင်းပြီးနားထောင်ကြ၊ မေးမြန်းစပ်စုကြနဲ့ တစ်ခါတလေ ဆရာတော် ညအိပ်ညဥ့်နေ အဝေးကြွတဲ့နေ့တွေဆို သန်းခေါင်လွဲအထိ မအိပ်ကြဘူး။
ကျောင်းမှာ အမြဲနေကြတော့ အလှူအတန်းကြွတဲ့ ဆရာတော်ကြီးများနဲ့လည်း ရင်းနှီး ကျွမ်းဝင်ကြတယ်။ ဆရာတော်တွေနောက် ပါလာတတ်တဲ့ လှည်းမောင်းကပ္ပိယ တွေနဲ့လည်း တရင်းတနီး အကြောင်းသိ အပေါင်းအသင်းတွေလို ဖြစ်နေကြတာပေါ့။
တစ်ခါတော့ အလှူတစ်ခုမှာ ဆရာတော်ကြီးတွေ အတော်စုံတယ်။ နံနက်စော အရုဏ်တက် ရေနွေးကြမ်းဝိုင်းမှာ ဆရာတော်ကြီးများနဲ့ ကပ္ပိယများ စကားစမြည်ပြော ကြရင်း ကံ,ကံရဲ့ အကျိုးနဲ့ ပတ်သက်ပြီး ပြောကြရာက အာဂန္တုလှည်းမောင်း ကပ္ပိယကြီး တစ်ဦးက ကံအကျိုးပေးကွာခြားပုံနဲ့ ပတ်သက်ပြီး ဦးသာမှတ် တို့ ညီအစ်ကို ကို နမူနာ ထိုးပြတယ်။ ညီအစ်ကိုချင်းဖြစ်ပေမယ့် ဦးသာမြတ် က အိုကံကောင်းပုံ၊ ပစ္စည်းဥစ္စာ ပြည့်ပြည့်စုံစုံနဲ့ သိုက်သိုက်ဝန်းဝန်းနေထိုင်ရပုံ၊ ဦးသာမှတ် ကတော့ ကသိလင်တနဲ့ ဘုန်းကြီးကျောင်းမှာ ကပ္ပိယဖြစ်နေရပုံတို့ကို နှိုင်းယှဉ်ပြန်ပြောနေပါတယ်။ အဲဒီ အချိန်မှာ ကျောင်းခံက ကပ္ပိယတွေကတော့ သူ့အလုပ်နဲ့သူ မအားလို့ စကားဝိုင်းမှာ မပါနိုင်ကြဘူး။
ကပ္ပိယကြီးရဲ့ စကားကိုကြားတော့ ရွားကျောင်းဆရာတော်က-----
“ကပ္ပိယကြီးရဲ့ ဘုန်းကြီးပြောတာ ခဏနားထောင်ပြီး သေသေချာချာစဉ်းစား ကြဦး။ ဘုန်းကြီးပြောပြမယ်။ အခု ကပ္ပိယတို့ ပြောနေတာ အိုကံကောင်းပုံကို ပြော နေတာနော်။ ကံကောင်းတာနဲ့ ကံရဲ့ အကျိုးကောင်းတာ ကွဲကွဲပြားပြားမဖြစ်ဘဲ လုံးထွေး နေတယ်။ “ဘုန်းကြီးရဲ့ ကပ္ပိယကြီး ဦးသာမှတ်က အခုဆို မြန်မာအို ကျောင်း ကြိုကျောင်းကြား” ဆိုသလို ကျောင်းမှာ ကပ္ပိယလုပ်နေရတယ်။ သူ့ညီ ဦးသာမြတ် က ရွာထဲမှာပဲ စည်းစိမ်ဥစ္စာအပြည့်အစုံနဲ့ နေရတယ်။ ဒါကြောင့် ဦးသာမှတ် က အိုကံ မကောင်းဘူး။ ဦးသာမြတ်က အိုကံကောင်းတယ်” ပြောနေကြတာ မဟုတ်လား။ အဲဒါ ကပ္ပိယတို့ က ကံနဲ့ ကံရဲ့အကျိုး မကွဲပြားဘဲ လုံးထွေးပြီး အသိမှားကြတာ။
စည်းစိမ်ဥစ္စာ တို့ အခြွေအရံတို့ ဆိုတာ ကံတွေ မဟုတ် ကံရဲ့ အကျိုးတွေ ဗျ။ ကံဆိုတာ ကိုယ်အားထုတ်ထားတဲ့ ဒါန၊ သီလ၊ ဘာသနာအလုပ်တွေကို ခေါ်တာ။ အဲဒါဆို ကွဲကွဲပြားပြားသိပြီဆိုရင် ကပ္ပိယတို့ စဉ်းစားကြည့်စမ်း---
ဒကာကြီး ဦးသာမြတ်က ရွာထဲမှာ စည်းစိမ် ဥစ္စာတွေ၊ သားသမီးမြေးမြတ်တွေနဲ့
သိုက်သိုက်ဝန်းဝန်းနေတာ မှန်တယ်။ သူ့မှာ အတိုးအငှားကိစ္စတွေ၊ ပင်ထောင်ပေးထား တဲ့ ကိစ္စတွေနဲ့၊ အသစ်ပေးရတာရော၊ အဟောင်းတောင်းရတာ၊ စာရင်းမှတ်ရတာနဲ့ လုံးချာကို လိုက်လို့။ အခါကြီးရက်ကြီးတွေမှာတောင် ဥပုသ်သီတင်း မှန်မှန် မစောင့်နိုင် ရှာဘူး။ အိုးအိမ်ခွဲသွားတဲ့ သားသမီးတွေကို အမွေခွဲပေးတာ မသင့်မျှနိုင်လို့ ပူညံပူညံ လည်း ခဏခဏ ဖြစ်ရသေးတယ်နော်။ ဒီကြားထဲ အတိုးအရင်း ပေးထားတဲ့ လူတွေနဲ့ တရားတပေါင်တွေ့ရတာလည်း ရှိသေးတယ်။ အခုတောင် အပေါင်ခံထားတဲ့ ယာမြေ တွေ ဟို ပိုင်ရှင်က လာရွေးတာ၊ အရွေးမခံလို့ဆိုပြီး တိုင်ကြ တောကြလို့ ကြီးတောင့် ကြီးမားနဲ့ မြိုံကို ရုံးချိန်းသွားနေရလို့ ရွာမှာ မကပ်နိုင်သေးဘူးတဲ့။ အဲဒါ ကပ္ပိယတို့ လည်း ကြားတယ်မဟုတ်လား။
ဘုန်းကြီးကျောင်းမှာ ကပ္ပိယကြီး ဦးးသာမှတ် ကို ကြည့်လိုက်စမ်း။ မနက်စော အရုဏ်တက်လို့ နိုးပြီဆိုတာနဲ့ ဗုဒ္ဓဝေယျာဝစ္စ၊ သံဃာ့ဝေယျာဝစ္စတွေလုပ်လို့၊ နေ့ခင်း ကျောင်းသားကိုရင်တွေ စာသင်ချိန်မှာ သူတို့က သူတို့ဇရပ်မှာ တရားအားထုတ်လို့၊ ဘာစာရင်းမှလည်း မရှုပ်ဘူး။ ဘယ်သူနဲ့မှလည်း တရားတပေါင်တွေရတာမရှိဘူး။ ရစရာကော ပေးစရာကော ဘာမျှ အထူးအထွေ မရှိလို့ လောဘ၊ ဒေါသတွေလည်း ပွားစရာမရှိဘူး။ အဲ အတိတ်ကံရဲ့ အကျိုးအရ စည်းစိမ်ဥစ္စာတွေ မပိုင်ဆိုင်ကြပေမယ့် တကယ့် အိုကံအစစ် ဖြစ်တဲ့ ဒါန၊ သီလ၊ ဘာဝနာတွေကတော့ဖြင့် ညီအစ်ကိုချင်း ကွာချင်တိုင်း ကွာမနေပေဘူးလား။ ကဲစဉ်းစားကြည့်ကြစမ်း၊ ဘယ်သူက အိုကံကောင်း သူ အစစ်လဲ။
ကပ္ပိယတို့ သေသေချာချာ စဉ်းစားကြ။ မြတ်စွာဘုရား သာသနာအတွင်းမှာ လူဖြစ်ကြရတုန်း ဘုရားတပည့်သားပျော်နည်း ပျော်တတ်ရတယ်။ ငါးပျော် ပျော် မနေရဘူး။ ဒါကိုကော သဘောပေါက်ကြရဲ့လား။ ဘုရားတပည့်သားဆိုတာ တရားနဲ့ ပျော်ရတာမျိုးနော်။ ဟို ရေကန်ထဲမှာ ငါးတွေအကြောင်း သတိထားမိရဲ့လား။ ကန်ထဲမှာ ရေတွေများနေတုန်းတော့ တစ်ကောင်နဲ့ တစ်ကောင်၊ တစ်အုပ်နဲ့ တစ်အုပ် တယ်ပြီး မစုမိကြသေးဘူးနော်။ အဲ-- ကန်မှာ ရေတွေနည်းလာပြီဆိုတော့ ကျန်တဲ့ ရေကွက် ကျဉ်း ကျဉ်းလေးထဲမှာ ငါးတွေ စုမိလာကြပြီး အဲဒီအချိန်မှ ဘ၀တူတွေ တိုးကြလုကြ နဲ့ သူဘ၀နဲ့သူတော့ ပျော်နေကြတာပဲ မဟုတ်လား။ သူတို့က ငါးတွေမို့လို့ ဘာမျှ မစဉ်းစား တတ်ကြပေမယ့် လူတွေအနေနဲ့ သေချာစဉ်းစားကြည့်စမ်း။ ဒီလို စုဝေးမိကြတယ်ဆို တာ ရေခန်း ချိန် ရောက်လာလို့ဗျ၊ မဟုတ်လား။ မကြာခင်ရေတွေ အကုန်ခမ်းသွားပြီ ဆိုရင် သူတို့ ဘာဖြစ်ကြမှာလဲ။ ဒါကို သူတို့သတိပြုရမှန်း မသိပေမယ့် လူတွေက သတိပြုရမယ်။
ကဲ လူလောကမှာလည်း စဉ်းစားကြည့်။ သားတွေ သမီးတွေသာမက မြေးတွေ မြစ်တွေအထိ တစ်စုတစ်ဝေးကြီးဖြစ်ချိန်ဆိုတာ ဘယ်လိုအချိန်မျိုးမှာ ဖြစ်တာလဲ။ ဘ၀ ရေခန်းချိန်ရောက်လို့ ဖြစ်တာဗျ။ ဒါကို သတိမထားဘဲ ပျော်နေကြတုန်းဆိုရင် ဘာပျော် နည်းပျော်တာလဲ။ ရှင်းရှင်းပြောရရင် “လူပျော်လား၊ ငါးပျော်လား” ဆိုပြီး ဆရာတော်က စကားကို ခဏရပ်လိုက်တော့ ကပ္ပိယကြီးတွေ ငြိမ်လို့။
ခဏနေတော့မှ ကပ္ပိယကြီးတစ်ဦးက “ ဆရာတော်ကသာ ကြားကောင်းအောင် ငါးပျော် ပျော်တယ် လို့ဆိုပေမယ့် အမှန်ကတော့ ငါးဆိုတာ တိရစ္ဆာန်ပဲဘုရား။ လက်စ သတ်တော့ တပည့်တော်တို့တစ်တွေဟာ ကိုယ်တိုင်လည်း တိရစ္ဆာန်ပျော်နည်းနဲ့ ပျော်ချင်နေကြပြီး သူများတွေ တိရစ္ဆန်ပျော် ပျော်နိုင်ကြတာကို အဟုတ်ကြီးမှတ်ပြီး အားကျမိနေကြတာကိုးဘုရာ့” လို့ လျောက်ထားပါတယ်။
အေး ပြုခဲ့တဲ့ ကံဟောင်း အထောက်အပံကောင်းလို့ စည်းစိမ်ဥစ္စာတွေ အခြွေအရံ တွေ ဘယ်လောက်ပဲ ပေါများနေနေ အိုလာပြီဆိုမှတော့ ခံစားနိုင်စွမ်းလည်း မရှိကြ တော့ပါဘူး။ ဒါတွေကို အဟုတ်မှတ်ပြီး သာယာ စွဲလမ်းနေကြမယ်ဆိုရင်လည်း အိုကံဆိုးတွေ အဖြစ်နဲ့ နောက်ဆုံးမှာ သေကံဆိုးတွေ ဖြစ်ကြရမှာပဲ။ ရှေးက မြန်မာ ကြီးတွေ နာနာကြည်းကြည်းဆဲကြတဲ့ စကားတစ်ခုမှာ “သေခြင်းဆိုး”ဆိုတာ ရှိတယ် မဟုတ်လား။ အဲဒါ ဒီလိုလူမျိုးတွေကို ပြောတာပဲ။
အလောင်းတော်ကြီးတွေ အသက်အရွယ်ကြီးရင့်လာကြတဲ့အခါ ထီးနန်းစည်း စိမ်တွေကို စွန့်ပြီး တရားနဲ့ မွေ့လျော်ကြတယ်။ တောထွက်ကြတယ်ဆိုတာ ကြားဖူး ကြတယ်မဟတုတ်လား။ လောကစည်းစိမ်တွေထဲမှာ ဘုရင်စည်းစိမ်ထက် ဘယ်ဟာ သာနိုင်ဦးမှာလဲ။ ဒါတွေကို သာယာနေရင် အိုကံဆိုးတွေ၊ သေခြင်းဆိုးတွေအဖြစ်နဲ့ နိဂုံး ချုပ် ကြရမှာစိုးလို့၊ ဒါတွေကို စွန့်ပြီး အိုကံကောင်းသူ အစစ် ဖြစ်အောင် တရားနဲ့ မွေ့လျော်သွားကြတာပေါ့”လို့ အကျယ်တ၀င့် မိန့်ကြားတော်မူပါတယ်။
ခေါင်းရင်းပိုင်းမှာထိုင်နေတဲ့ ဆရာတော်ကြီးတစ်ပါးကလည်း “ကဲ ကပ္ပိယတို့ ဒီနေ့ စကားဝိုင်းကဖြင့် တို့တစ်တွေ သတိမထားမိတဲ့အချက်တွေကို အရေးတကြီး သတိပေး လိုက်တာပဲ။ ဥယျာဉ်ဆရာတော် ပြောတာ မှန်တယ်။ ပုဗ္ဗဏှသုတ် မှာ မြတ်စွာဘုရား ဟောထားတဲ့ သုနက္ခတ္တံ စတဲ့ ဂါထာမှာ ဆိုထားတာရှိတယ်။ သုစရိုက် တရားများအား ထုတ်နေသူဟာ အမြဲတမ်း နက္ခတ်(ဇာတာ စန်းလဂ်)ကောင်းနေသူ၊ မင်္ဂလာအပေါင်း အမြဲတမ်း ခညောင်းနေသူ ဖြစ်ရုံမျှမက အချိန်တိုင်း ခဏတိုင်းမကောင်းမရှိ အကောင်း အတိသာဖြစ်တယ်၊ သုစရိုက်ပွားပြီး တရားနဲ့ မွေ့လျော်သူမှန်သမျှ အိုကံ သာမကဘူး၊ နာကံတွေ၊ သေကံတွေ၊ ဘ၀ကူးကံတွေကစပြီး နိဗ္ဗာန်ရသည်အထိ ကံကောင်းကြ သူတွေ ဖြစ်မှာ မလွဲဘူး။ အဲ တို့တစ်တွေ သာသနာကြုံတုန်း လူဖြစ်တုန်းမှာ အိုခြင်းဆိုး၊ နားခြင်းဆိုး၊ သေခြင်းဆိုးတွေ မဖြစ်ကြဘဲ တစ်သံသရာလုံး ကံကောင်းသူတွေဖြစ် အောင် ကြိုးစားကြဖို့သာ မမေ့မလျော့ကြနဲ့” လို့ မိန့်ကြားလိုက်တဲ့အခါ တစ်ကျောင်းလုံး သာဓုသံတွေ လွှမ်းသွားပါတော့တယ်။

ဓမ္မဘေရီအရှင်ဝီရိယ(တောင်စွန်း)

http://ashinsirinda.com/ မှကူးယူဖော်ပြပါသည်။