မည့်သူ့ကို အပြစ်တင် ရမည်နည်း
မြင့်မောင်မောင်
မြင့်မောင်မောင်
“ကံကော်နံ့လည်း မသင်း၊ သစ်ပုပ်ပင်တို့၊ အဓိပတိ လမ်းတို့၊ ဦးချစ်ဆိုင်တို့ အကြောင်းလည်း မပါတဲ့ တက္ကသိုလ်က ဇာတ်လမ်းမျိုးတော့ မဟုတ်ဘူး ပေါ့ကွာ။ ဒါပေမယ့်” တင်ဝင်းက စကားကို ဆက်မပြောဘဲ ရပ်ထားသည်။ ကျွန်တော့် မျက်နှာကို စေ့စေ့ ကြည့်နေ၏။ သူစကားနာ ထိုးနေသည်လား၊ ရိနေသည်လား၊ သရော်သည်လား ကျွန်တော် မဝေခွဲနိုင်။ သို့သော် သူ့ဘ၀ ဇာတ်လမ်း ကလေးကို ကြားသောအခါ ကျွန်တော် ရင်နင့်သွားသည်။ သူနှင့် ကျွန်တော်သည် ဒေသစိတ် ကုန်သွယ်ရေး တစ်ခုတွင်း အတူတကွ အမှုထမ်းဖူးသည်။ ကြက်တောင် လက်ရွေးစင်များ အဖြစ် ကုန်သွယ်ရေး လူသစ်တန်းတွင် ဆုများ ရဖူးသည်။
ထို့နောက် လူချင်း ကွဲသွားကြပြီး သူပင်စင် ယူသွားသည်ဟု ကြားလိုက်ရသည်။ နောက် နယ်သို့ ပြောင်းသွားသည်ဟု ကြားရပြန်သည်။ တစ်နှစ်လောက် အကြာတွင် သူ စီးပွားရေး အခြေအနေ ကောင်းနေကြောင်း ကြားရသည်။ ကုန်သည် ပေါက်စကလေး ဖြစ်နေကြောင်း သိလာသည်။
ထို့နောက် လေးငါးနှစ် ကွဲကွာ သွားပြန်၏။ ယခု ပြန်တွေ့တော့ သူ့ကို အိမ်ထောင်ပျက် တစ်ယောက် အဖြစ် တွေ့ရသည်။ အောင်မြင်သော စီးပွားရေး တစ်ယောက် ဖြစ်လာလေမှ၊ သား သမီးများလည်း အရွယ် ရောက်ကြလေမှ စိတ်ဝမ်းကွဲပြား ခွဲခွာ လိုက်ကြသည် ဆိုတော့
“မင်းက ဖောက်ပြန်တာပဲ ဖြစ်ရမယ်”
“မဟုတ်ပါဘူး ကိုမြင့်ရာ၊ နင် ငါ့အကြောင်း သိပါတယ်”
ထို့နောက် သူအကြောင်းများကို ဆက်ပြောသည်။ သောက်နေရသော အရက်က မမူးဘဲ သူ့ဝေဒနာများက ပို၍ မူးလာစေသည်။ ခေါင်းညိတ် နားထောင်ရင်းက သက်ပြင်းများသာ ချနိုင်ခဲ့သည်။ ကံနဖူးစာ ရေစက် မင်ရေကျဲခဲ့လေခြင်း ဟုသာ ပြောရမတတ် ရှိတော့သည်။ သူပြောသမျှကား သူ့ဘက်က အကောင်းချည်းသာ။
“ဒါနဲ့ မင်းရော နောက်ထပ် အိမ်ထောင်မပြုဘူးလား။ လေးဆယ်ဆိုတာ အခုမှ ဘ၀ကိုစတာကွ”
“တော်ပါပြီကွာ၊ သမီးတွေ သားတွေအတွက် နောက်ထပ် မိထွေးတစ်ယောက် မပေးချင်တော့ပါဘူး။ အောင်မြင်တဲ့ စီးပွားရေး သမား တစ်ယောက်ဖြစ်အောင် ငါကြိုးစားနေတယ်”
တင်ဝင်း စကားကြောင့် သာဓု တစ်ခွန်း စိတ်ထဲက ခေါ်လိုက်ရသည်။ သူ့ကြည့်ရသည်မှာ အခါတိုင်းနှင့်တော့ မတူ။ ပို၍ တည်ငြိမ်လာ၏။ ခါတိုင်း တွေ့နေကျသူကား တက်ကြွ ဖျတ်လတ်လျက်၊ ဆဲဆို ရယ်မောလျက်။
“အေးကွာ ကြားရတာ စိတ်တောင် မကောင်းဘူး။ မိစန်းကို အိမ်ထောင်ရှင်မကောင်း တစ်ယောက် အနေနဲ့ ငါအမြဲတမ်း လေးစားနေခဲ့တာကွ။ အေးလေ”
ကျွန်တော် ဆက်မပြောနိုင်။ နောက်တော့လည်း သူ့ လာရင်း ကိစ္စဖြစ်သော အသုံးလုံးကြေ အောင်ပွဲအတွက် စာစောင် ထုတ်ဝေရေး၊ ပြီးတော့ ကျွန်တော့်ထံမှ စာမူ တောင်းလေသည်။
သူသည် ရန်ကုန်တွင် တစ်ပတ်ခန့်ကြာ နေထိုင်ပြီး ရေးသို့ ပြန်သွားလေသည်။ ကျွန်တော့်စာမူ အတွက် ကျေးဇူးစကား ဆိုသွားလေ၏။
“မင်းကို အရင်က အတိုင်း တွေ့ရတာ ငါဝမ်းသာတယ် သူငယ်ချင်း။ ပြီးတော့ ကံ့ကော်နံ့မသင်း၊ တက္ကသိုလ် လွမ်းချင်း မဟုတ်တဲ့ လူထဲက ငါ့ဘ၀ ၀တ္ထုလေး တစ်ပုဒ်ကိုလည်း မင်းရေးကြည့်ပါဦးကွာ”သူသည်သို့ပြောကာ မချိပြုံး ပြုံး၍ ကျွန်တော့်လက်ကို တင်းတင်းဆုပ်ထားသည်။ သူ့မျက်လုံးက ရီဝေနေလေသည်။
သို့နှင့် ကျွန်တော်သည် မေ့လျော့စွာပင် နေခဲ့သည်။ သုံးလေးလ အကြာတွင် သူ့ထံက စာတစ်စောင် ရောက်လာ၏။ လူကြုံနှင့် ပေးလာခြင်း ဖြစ်သည်။ အသုံးလုံးကြေအောင်ပွဲ စာ စောင်ကော်မတီမှ လက်ဆောင်အဖြစ် ရင်ထိုးတံဆိပ်၊ ဦးထုပ်၊ လွယ်အိတ်၊ လက်ဆွဲအိတ်တို့ ပေးလာ၏။ ကျွန်တော်က ပွဲပြီး မီးသေ သဘောမျိုးထားခဲ့သော်လည်း သူသည် အာရုံစွဲလျက် ရှိသည်။
ကိုမြင့်
နင်ကတော့ မေ့ချင် မေ့လျော့နေမယ်။ ငါကတော့ မမေ့နိုင်သေးဘူး။ ငါ့အကြောင်း မရေးဖြစ်သေးဘူးလား။
ဘာလဲကွ နှုတ်ခမ်းနီ ပါးနီမလေးတွေက မကြိုက်မှာ စိုးလို့လား။ မင်းရေးမယ့် နေ့ကို စောင့်ပြီးတော့ ငါဖတ်မယ်ကွာ။ ငါ့ဆီလည်း လာခဲ့ဦး။
မင်းရဲ့
တင်ဝင်း
၂။
တင်ဝင်းတစ်ယောက် ပင်စင် ယူတော့မည်ဟု ဆုံးဖြတ်သော အခါ စန်းစန်းတစ်ယောက် အတန်တန် တားမြစ်ခဲ့သည်။
“စဉ်းစားပါဦး ကိုဝင်း ရယ်။ ဒီမှာ အခြေချခဲ့တာပဲ ကြာလှပြီ။ ကိုယ့်အိုးကိုယ့်အိမ်၊ ကိုယ့်ပတ်ဝန်းကျင်ကိုလည်း တွယ်တာနေပြီ မဟုတ်လား။ ကလေးတွေက ရန်ကုန်မှာနေပြီး တော့မှ တောမြို့ကလေးကို ဘယ်ပြောင်းချင်မှာလဲ။ ပြန်စဉ်းစားပါဦး ကိုဝင်းရယ်”
စန်းစန်း ကိုယ်တိုင်လည်း ရန်ကုန်မြို့ကို မခွာနိုင်။ သည်မှာက လက်လုပ်လက်စား ဆိုသော်လည်း အစစ ငြိမ်းချမ်းသည်။ ပျော်စရာ ရွှင်စရာ အပန်းဖြေစရာတွေက အပြည့်။ ရုပ်ရှင် ကြည့်မလား၊ တီဗွီကြည့်မလား၊ စတေ့ခ်ျရှိုး ကြည့်မလား၊ ဇာတ်သဘင် ကြည့်မလား၊ နောက်ဆုံးပေါ် အ၀တ်အစား ၀ယ်မလား အကုန်ရသည်။
“ကိုယ်စဉ်းစားပြီးပြီ စန်း။ အထက်တန်း စာရေး ဘ၀နဲ့ တော့ လူမွေး ပြောင်စရာ အကြောင်းမရှိဘူး။ အရောင်းအ၀ယ် လုပ်ဖို့ ကိုယ်ဆုံးဖြတ်ပြီးပြီ။ ဂရက်ဂျူတီရယ်၊ ပင်စင်ရယ် ပေါင်းလိုက်ရင် ကိုယ်တို့အတွက် အရင်းအနှီးတော့ ရမှာပဲ။ သားတွေ သမီးတွေ နောင်ရေးပါစန်း။ ရွှေကျောင်းပြောင်ပြောင် ၀မ်းဟောင်ဟောင် ဘ၀မျိုးက ရုန်းထွက်စရာ ဒီတစ်နည်းပဲ ရှိတယ်”
တင်ဝင်းက ခိုင်မာ မြဲမြံသော သန္နိဋ္ဌာန်ဖြင့် ပြောနေသော အခါ စန်းစန်းတစ်ယောက် စောဒက မတက်သာတော့။
“အင်းလေ ကိုဝင်း ကောင်းမယ် ထင်တာသာ လုပ်ပါ။ ဟိုမှာလည်း အမျိုးတွေ ရှိတာပဲ။ ဒုက္ခဖြစ်စရာ အကြောင်းတော့ မရှိပါဘူး။ တစ်ခုတော့ ရှိတာပေါ့လေ။ ပုံမှန် ၀င်ငွေတော့ မရှိဘူးပေါ့”
တင်ဝင်းက တည်ငြိမ်စွာ ရှိနေသည်။ သူ့မျက်နှာသည် ယုံကြည်မှုဖြင့် ရင့်ကျက်နေ၏။ စန်းစန်းသည် လင်သား ဖြစ်သူ၏ စိတ်အား ထက်သန်မှုကို မတားဆီးချင်တော့။
“ပုံမှန်ဝင်ငွေထက် ပိုလာစရာ အကြောင်း မရှိတော့မယ့် အတူတူ ကိုယ်တို့ စွန့်စားကြည့်ရအောင်လားစန်း။ ကိုယ်ဈေးထဲမှာ ဆိုင်ခန်းလေး တစ်ခန်းလည်း ၀ယ်ဖို့ စီစဉ်ထားတယ်။ ကုန်မျိုးစုံဆိုင် ကလေး တစ်ဆိုင်စပြီး ဖွင့်ကြည့်တာပေါ့ကွာ။ နောက် အလုပ်လုပ်ရင်းက အမြင်ကျယ် လာမှာပါ။ အဲဒီတော့လည်း အခြေအနေ အရ တစ်မျိုး လုပ်ကြတာပေါ့”
သားနှင့် သမီးက ကန့်ကွက် ချင်ကြသော်လည်း ဖခင် မျက်နှာထားကြောင့် မည်သည့် စကားမျှ ၀င်မပြောကြတော့။ သူတို့ ပြောင်းရွှေ့မည့် မြို့ကလေးမှာ ရန်ကုန် မော်လမြိုင်သွား မီးရထားလမ်းမှ ဘီးလင်းမြို့နယ် အတွင်းရှိ မြို့ကလေး တစ်မြို့ဖြစ်သည်။ သူ့ဆုံးဖြတ်ချက်ကို သူ့သူငယ်ချင်းများက ဖျက် ကြသေးသော်လည်း သူမပြင်တော့။ နောက်ဆုံး အိမ်ကလေး ရောင်းချလျက် ပြောင်းရွှေ့ခဲ့ကြသည်။ တစ်ရွာမပြောင်း သူကောင်း မဖြစ်ဟူသော ထုံးကို နှလုံးမူခဲ့လေသည်။
နှင်းပုလဲမြို့ ကလေးသည် ရန်ကုန် မော်လမြိုင် မီးရထား လမ်းတစ်လျှောက်တွင် ထမင်းဟင်း ကောင်းသောကြောင့် ခရီးသွားများ ပါးစပ်ဖျားတွင် ရေပန်းစားခဲ့သည်။ တင်ဝင်း တို့မြို့ကလေးသို့ ရောက်ခါစတွင် အနည်မထိုင် သေးသောကြောင့် နေရ ထိုင်ရသည်မှာ အဆင် မပြေသေး။ မြို့ကြီးပြ ကြီးမှ တောမြို့ကလေးသို့ ပြောင်းလာကြသူများနှင့် ထုံးစုံ အတိုင်း အစစကွဲပြား ခြားနားလျက် ရှိသည်။ စန်းစန်းတစ်ယောက် ကျိတ်၍ မျက်ရည်ကျသည်။ သားနှင့်သမီးကလည်း တငြူငြူ တစူစူ။
သို့သော် ခြောက်လမှ တစ်နှစ်ကျော် ကြာသောအခါ တင်ဝင်း၏ စီးပွားရေး လာဘ်မြင်မှု၊ နှုတ်ချို၍ ဆက်ဆံရေး ကောင်းမှုတို့ကြောင့် ကုန်မျိုးစုံဆိုင်ကလေးမှာ တစ်နေ့တခြား ကြီးကျယ်လာ၏။ ဈေးထဲတွင်လည်း သူ၏ “ချစ်မိတ်ဆွေ” ဆိုင်ကလေးမှာ မသိသူ မရှိသလောက် ဖြစ်လာ၏။ အထည်၊ ဆေးဝါး၊ ကုန်ခြောက်၊ အလှကုန် စုံစီနဖာပင် တင်၍ ရောင်းသည်။ စီးပွားရေး အဆင်ပြေလာသော အခါ စန်းစန်းတို့ ရွှေတွဲ လဲ ငွေတွဲလဲ ဖြစ်လာပြန်သည်။ အမှုထမ်းမယား ဘ၀ထက် ပို၍ စိုပြည်ဝ ဖြိုးလာ၏။
တစ်နေ့တွင် တင်ဝင်းက စန်းစန်းကို လုပ်ငန်းတိုးချဲ့ရန် ဖွင့်တိုင်ပင်၏။
“စန်းရေ၊ ကိုယ်နောက်ထပ် ဆိုင်ခန်းလေး တစ်ခန်း ၀ယ်မလားလို့”
“ကိုဝင်းတော့ လောဘ ကြီးနေပြီ”
“မဟုတ်ဘူးကွ။ ဆိုင်ခန်းက ဈေးလည်း ချိုတယ်။ အကွက် အကွင်းလည်း ကောင်းတယ်။ ပြီးတော့ အဲဒီဆိုင်မှာ အလှကုန် ပစ္စည်းတွေချည်းပဲ တင်ရောင်းမယ်ကွာ။ စန်း အဲဒီမှာ ဦးစီးပြီးလုပ်။ ကဲ မကောင်းဘူးလား။ ကိုယ်တို့ အရွယ်ရှိတုန်း စီးပွား ရှာထားကြရအောင်”
တင်ဝင်းပြောသည်မှာ လမ်းကျသောကြောင့် စန်းစန်း မငြင်းသာ။ သို့သော် လင်သားအတွက် ၀တ္ထရား ပျက်မှာလည်း စိုးမိသည်။
“ဆိုင်မှာ အချိန်ပြည့် လုပ်နေရရင် ကိုဝင်းအတွက် ၀တ္တရား ပျက်နေပါ့မယ်ကွယ်”
“ကိစ္စမရှိဘူးလေ။ သမီးတို့လည်း ရှိသားပဲ။ ကိုယ် နားလည်ပါတယ် စန်းရယ်။ စန်း ဦးစီးပြီး လုပ်နိုင်ဖို့သာ အရေးကြီးတယ်”
“ကိုဝင်း ဆန္ဒဆိုရင် စန်းလုပ်ပါ့မယ်”
စန်းစန်း ခေါင်းညိတ်ခဲ့သည်။ မကြာမီ ဈေးထဲတွင် စန်းမေတ္တာ အလှကုန် ဆိုင်ကလေး သားသားနားနား ပေါ်လာ၏။ စန်းစန်းက နှုတ်ချိုရုံမျှမက မျက်နှာလည်း ချိုသည်။ တစ်ဖက်သားကို စကားပြောလျှင် ထာဝစဉ်ပြုံးရယ်လျက် ပြောတတ်သည်။ စန်းမေတ္တာသို့ ၀င်လာသူသည် ပစ္စည်းတစ်ခု ၀ယ်ပြီးမှ ပြန်ထွက်သွားရမည်။ ရံဖန်ရံခါ ဖောက်သည်ဖြစ် သွားစေရန် အရင်းအတိုင်း ရောင်းချလိုက်သည်များပင် ရှိ တတ်သည်။
တစ်နှစ်အတွင်းမှာပင် စန်းမေတ္တာ အလှကုန်ဆိုင်သည် တိုးတက်ကြီးပွား လာလေတော့သည်။ စန်းစန်းနားတွင် စိန် နားကပ်တစ်ရံက ၀င်းခနဲရောက်လာ၏။ သားတွေ သမီးတွေ မှာလည်း ရွှေမရှား၊ ငွေမရှား။ တင်ဝင်းကမူ သူ့ဆိုင်ကို သားသမီးများနှင့်လွှဲကာ မော်လမြိုင်နှင့် ကူးချည်သန်းချည် ရှိနေသည်။ အပေါင်းအသင်း နှင့်တွေ့လျှင် မိတ်ဖြစ်ဆွေဖြစ် သောက်စား တတ်လာသည်။ ထိုအခါ စန်းစန်းနှင့် ကတောက်ကဆ စကားများတတ်၏။
“ကိုဝင်း အရက်သောက်တာ လွန်နေပြီ”
“ဟ ကိုယ်လူမှန်း သူမှန်း မသိအောင် ဘယ်တုန်းက မူးဖူးလို့လဲ။ ရပ်ထဲရွာထဲမှာ အရှက်တကွဲ အကျိုးနည်းအောင် ရုပ်ပျက်ဆင်းပျက် ဖြစ်ဖူးသလား။ ပြောစမ်းပါဦး။ ကိုယ်တို့ ကုန်သည် အလုပ်ဆိုတာ သောက်ရင်း စားရင်း လုပ်ငန်း အကြောင်း ပြောကြရတာကွ”
“အင်း ဒါတော့ စန်းမသိဘူး။ အခု ကိုဝင်းဆိုင် ဘယ်အခြေအနေ ဖြစ်နေသလဲ ဒါကော ကိုဝင်းသိလား”
တင်ဝင်း ငိုင်သွား၏။ ဈေးထဲတွင် သူ့ဆိုင်သည် အရောင်းအ၀ယ် မကောင်းတော့ သလောက် စန်းစန်းဆိုင်ကား ကြီးကျယ်သည်ထက် ကြီးကျယ်လာ၏။ တိုးတက် အောင်မြင်လာ၏။ သို့တိုင် သူဝန်မခံချင်။ ပြီးတော့ စန်းစန်းက သူ့ကို နင်ပဲငဆ ပြောလာရသည် အထိ ဖြစ်ရသည်ကို သူ မစဉ်းစားတတ်။ ထို့ပြင် စန်းစန်းတစ်ယောက် လုပ်ငန်း အောင်မြင် လာသည်နှင့် အမျှ လက်မ ထောင်လာသည်ကို သူသတိထားမိသည်။ သူတို့ အိမ်ထောင်စုကို စန်းစန်းကပင် ဦးဆောင်နေသယောင် အပြော အဆိုများ ကြားလာရသည်။ စန်းစန်း ဆွေမျိုးများကလည်း မြှေက်ထိုးပင့်ကော် လုပ်ပေးလာကြသည်။
“နင်ကတော့ ဈေးထဲမှာ ဖင်ဂျွတ်တက်အောင် ထိုင်ပြီး ပါးစပ်က အမြှုပ်ထွက်အောင် ပြောလိုက်၊ ဆိုလိုက်၊ ရောင်း လိုက်ရတာ။ နင့်ယောက်ျားကတော့ အရက်ကလေး တမြမြ၊ ရထားပေါ်မှာ မှောင်ခိုမလေးတွေနဲ့ အကြည်ကို ဆိုက်လို့။ မိစန်း နော် နောက်တော့သာမပြောဘူး မရှိစေနဲ့။ တော်ကြာ ဒူးနဲ့ မျက်ရည် သုတ်နေရမယ်”
သည်လို စကားများက စန်းစန်း၏ မာနကို လှုပ်ခါသွား စေ၏။
“အို သူလည်း စီးပွား ရှာတာပဲ။ ငါလည်း ငါ့ခြေထောက် နှစ်ချောင်းအပေါ် ရပ်ပြီး စီးပွား ရှာနိုင်တာပဲ။ ဒင်းက သစ္စာ ဖောက်တော့ကော ငါက ကြောက်ရမှာလား”
စန်းစန်းစိတ်ထဲ သည်ကဲ့သို့ အတွေးဝင်လာ၏။ သည်တော့ တင်ဝင်း အပေါ်တွင် ဆက်ဆံရေးက အထစ်အငေါ့ ဖြစ်လာသည်။ လင်နှင့်မယားဟူ၍ မေတ္တာ နွေးနွေးထွေးထွေး အကြင်န ပေးရမည့် အစား ဥပေက္ခာဖြင့် အေးစက်လာသည်။ မျက်နှာချင်း ဆိုင်ရမည့် အစား တစ်ယောက်နှင့် တစ်ယောက် မျက်နှာချင်း မဆိုင်မိအောင် ရှောင်လာကြသည်။
တင်ဝင်း စိတ်ထဲတွင်မူ နောက်ကျိ ရှုပ်ထွေးလျက် ရှိသည်။ လင်တစ်ထမ်း မယားတစ်ရွက် အဖြစ် စီးပွားဖက် အဖြစ် အလုပ် လုပ်ခဲ့ကြသည်။ ယခုမူ သူ့ခြေသူ့လက် စီးပွားရေး အကွက် မြင်သူဖြစ်လာသော အခါကျမှ သူ့အပေါ် အမြင် ရိုင်းလာသည်။ အကြင်နာ စိမ်းလာသည်။ အယုအယပေါ့တန်လာသည်။ အစား အသောက်ကအစ သူ့အတွက် ဦးစားပေးခြင်းမရှိတော့။ အ၀တ် အစားက အစ မီးပူကျ ခေါက်ရိုး မကျိုးချင်တော့။ ရံဖန်ရံခါ တော့လည်း မယားဖြစ်သူ၏ အယုအယကို တမ်းတလာ သည်။ စန်းစန်းကမူ သူ့အလုပ်နှင့်သူ ဂျင်ခြေလည် နေသောကြောင့် သူ့ကို ဖုတ်လေသည့် ငါးပိ ရှိသည်ဟု မထင်တော့။
တင်ဝင်း စီးပွားရေး အရ အောင်မြင်သူတစ်ယောက် ဖြစ်လာသော်လည်း အိမ်ထောင်ရေးတွင် ရှုံးနိမ့်မှန်းမသိ ရှုံးနိမ့် လာလေသည်။
သူသည် အတိတ်ကို လွမ်းဆွတ်လာ၏။
၃။
“ကိုဝင်းရေ၊ ဒီမှာ ကိုဝင်းကြိုက် တတ်တဲ့ ပုစွန်တုပ်ကြီးတွေ။ သမီးတွေ၊ သားတွေ အတွက်တော့ ဘဲဥချဉ်ရည်နော်”
စန်းစန်းက သူ့အကြိုက်ကို တခုတ်တရ တမြတ်တနိုး ချက်ပြုတ် ကျွေးမွေးတတ်၏။ သူမနှင့် သားသမီးတွေ အတွက်မူ တော်ရိလျော်ရိပင်။ အ၀တ်အစား ဆိုလျှင်လည်း ခေါက်ရိုး မကျိုးစေရ။ ရုံးသွားခါနီး ရေမွှေးကိုယ်တိုင် ဆွတ်ပေးလိုက် သေးသည်။ ထမင်းစားလျှင် အနားတွင် ထိုင်လျက် ယပ်ခတ်ပေး နေတတ်သည်။ ငါးဆိုလျှင် သူက အရိုးများပါက မစားတတ်။ စန်းစန်းက အရိုးထွင် ပေးရသည်။ လင့်တစ်မျက်နှာ တစ်ရွာထင် နေသော စန်းစန်းသည် အဘယ်တွင် သေဆုံး သွားပြီနည်း။ အယုအယ အကြင်နာတို့သည် ကျောက်ဖြစ်ရုပ်ကြွင်းများ ဖြစ်ခဲ့လေပြီ။
သူသည် အဘိုးအဘွား များလက်ထက် မိဘလက်ထက် က စီးပွားဖက်အိမ်ထောင်သည် ဘ၀များကိုတွေးတောကာ တမ်းဆွတ်မိ၏။
အဘိုးက စီးပွားရှာသည်။ အဘွားက အိမ်ထောင်ထိန်း သည်။ သားသမီးများသည် လည်း အိမ်ထောင်ဦးစီး ၀င်ငွေ ပေါ်တွင် မှီခိုနေနိုင်၏။ အမိ အဘများ လက်ထက်တွင်လည်း သည်အတိုင်း။ တစ်လင် တစ်မယား စနစ် ချစ်ချစ်ခင်ခင် ရှိသည်။
ယခု သူတို့ခေတ်ကျတော့ လင့်လုပ်စာကို အိမ်ထောင် တစ်ခုလုံး မှီခို စားသောက်နိုင်ခြင်း မရှိတော့။ မယားကလည်း တစ်ရွက်တပိုး အားကိုး စီးပွားရှာရ၏။ အရင်း စစ်ကြည့်သော အခါ ကုန်ဈေးနှုန်းသည် တရားခံဖြစ်၏။ တင်ဝင်းသည် တရှည် တမျောကြီး စဉ်းစားနေမိသည်။ စိတ်ကပို၍ မောပန်းနွမ်းနယ်လာ၏။ ဆင်းရဲသော ဒဏ်ကို ခံနိုင်သည်။ ချမ်းသာသည့် ဒဏ်ကို မခံနိုင်ဟူသော လူကြီး သူမတို့၏ စကားကို ကြားယောင်လာ၏။ ရန်ကုန်တွင် စာရေး ကလေးဘ၀ဖြင့် မရှိအတူ ရှိအတူ အေးအတူ ပူအမျှ နေခဲရ သော ဘ၀ကလေးကို တမ်းတနေမိသည်။
စန်းစန်းကို အိမ်ထောင် ထိန်းသိမ်းသူ အိမ်ရှင်မ ဘ၀မှ စီးပွားရေး သမားတစ်ယောက် အဖြစ် သွတ်သွင်းပေးမိသော မိမိအမှားကိုလည်း မြင်ယောင်သိတတ်လာ၏။ မိန်းမနှင့် ယောက်ျား စီးပွား ရှာကြစတမ်း ဆိုလျှင် ယောက်ျားက လက်ဖွာ သည့်နှင့်အမျှ ယိုပေါက်များသည်။ မိန်းမ ခြစ်ကုတ်စုဆောင်း ထိန်းသိမ်း တတ်ကြသည်။
ယခုပင်ကြည့်လေ။
နှစ်နှစ်၊ သုံးနှစ်အတွင်း သူသည် စီးပွားရေး တိုးသင့် သလောက် မတိုး။ စန်းစန်းက စိန်ရွှေ သီးရုံမျှမက စန်းမေတ္တာ အလှကုန်ဆိုင်တွင် ကာလပေါ် အထည်များ၊ နိုင်ငံခြားဖြစ် အ၀တ်အစားများက အစ တင်ရောင်းကာ သူ့ကိုပင် ကျောသွားလေပြီ။ ပြီး ထိုကြားထဲ သူသည် မော်လမြိုင်ဘက်သို့ သွားပြီး အပိုင် ၀ယ်ခဲ့သော ပစ္စည်း နှစ်သောင်းကျော်ဖိုးခန့် အဖမ်းခံလိုက် ရသေးသည်။ စန်းစန်းက မဲ့ရွဲ့ကာ ရှိနေတော့၏။
“အိမ်မှာ အေးအေး ထိုင်စား၊ ကုန်သည်လိုလို ဘာလိုလို နဲ့ မှောင်ခိုမ ကလေးတွေနဲ့ ပလူး နေတာလည်း မသိဘူး မထင်နဲ့။ မိစန်းတို့က လင်တစ်ယောက်ကို အလှကြည့်ပြီး လုပ်ကျွေးနိုင်တယ်”
မကြားတကြား ပြောသော စကားများ ဖြစ်သည်။ တင်ဝင်း ဆုံးရှုံးသည့် ငွေများ ပြန်ရအောင် ကြိုးစားသော်လည်း ကုသိုလ်ကံက မလိုက်။ ကြာတော့လည်း ကိုယ့်လိပ်ပြာ ကိုယ်ရှက်လာ၏။ အိမ်တွင်လည်း စန်းစန်းနှင့် မျက်နှာချင်း မဆိုင်မိသည်မှာ လနှင့်ချီ၍ ကြာမြင့်ခဲ့ပြီ။ သူစိမ်းများနှယ် ဖြစ်ခဲ့ပြီး တစ်အိပ်ရာစီ ခွဲအိပ်ခဲ့သည်မှာပင် တစ်ရာသီကျော် ခဲ့ပြီ။ စန်းစန်း ဆွေမျိုးများကလည်း အိမ်သို့ ဥဒဟိုဝင်ထွက်ခဲ့ ကြသည်။ သူတို့ရယ်မောသံများက သူ့ကိုလှောင်သည်သို့ရှိ သည်။ သူတို့၏ အပြုံးများက သူ့ကို သရော် နေသည်ဟုပင် ထင်ခဲ့သည်။
သည်ကြားထဲ အကုသိုလ်က အလုံးအရင်းနှင့် ၀င်သည်ဟု ခေါ်ရမည်လား မသိ။ တစ်နေ့တွင် အမျိုးသမီး တစ်ယောက် အိမ်သို့ ရောက်လာ၏။ သူရော စန်းစန်းပါ ရှိနေကြသည်။
“ကိုဝင်း ရှိပါသလားရှင်”
“ရှိပါတယ်။ ဖေဖေရေ ဧည့်သည်လာတယ်”
သမီးကြီး၏ မရှေးမနှောင်း အသံနှင့်အတူ အမျိုးသမီး တစ်ယောက်အိမ်ပေါ် ရောက်လာ၏။
“သြော် ခိုင် လာထိုင်”
ခိုင်သည် ငယ်သည်။ ချောသည်။ သို့သော် မှောင်ခိုမယ် ကလေးတစ်ယောက် ဖြစ်သည်။ သူနှင့်အလွန် ရင်းနှီးဖူးသည်။ ခိုင်က ဧည့်ခန်းရှိ ဆက်တီတွင် သူနှင့် မျက်နှာချင်း ဆိုင်ဝင်ထိုင်သည်။
“ခုတလော ကိုဝင်း ငြိမ်နေပါလား”
“ကိုယ် အချီကြီးထိ သွားတာ ခိုင်လည်း သိသားပဲ”
“အင်း ခိုင်လည်း အရင်း ပြုတ်သွားပြီ ကိုဝင်း”
စန်းစန်းက မနီးမဝေးတွင် ထိုင်ရင်း နားထောင်နေသည်။ ခိုင့်ကို တစ်ချက် အကဲ ခတ်ကြည့်ပြီး မျက်နှာလွှဲသွား၏။
“အခြေအနေတွေကတော့ သိပ်မကောင်းဘူးခိုင်။ အဖမ်း အဆီးတွေကလည်း တော်တော် များနေတယ်”
“ကိုဝင်းက ကိစ္စ မရှိဘူးလေ။ ခိုင်တို့မှာက ဆုပ်လည်းစူး စားလည်းရူးပဲ။ အမေတို့ အားလုံးက ခိုင့်အပေါ် မှီခိုနေတာ ဆိုတော့ နားနေလို့ မရတော့ဘူး။ ငွေမျောရင် ငွေနဲ့ လိုက်ရတော့ မှာပဲ ကိုဝင်း”
“အင်း ဒီတော့ ကိုယ်ဘာလုပ် ပေးရမလဲ ခိုင်။ ကိုယ်လည်း အခြေအနေတော့ မကောင်းဘူး။ ခိုင်သိပါတယ်လေ”
ခိုင်က စန်းစန်းကို မျက်လုံး ဝေ့ကြည့်သည်။ တင်ဝင်း သက်ပြင်း ရှိုက်မိသည်။ ခိုင့်အပေါ်တွင် သူသနားရာက အကူ အညီပေးရင်း သံယောဇဉ်ကား ဖြစ်မိသည်ပင်။
“ခိုင့်ကို ငွေတစ်ထောင်လောက် လှည့်ပါဦး ကိုဝင်းရယ်”
တင်ဝင်း ဘာမှ မပြောတော့။ ငွေတစ်ထောင် ယူပေးလိုက်သည်။ စန်းစန်း၏ မျက်စောင်း တစ်ခုကို သူရရှိလိုက်၏။
“ကိုဝင်း ကျေးဇူးတွေကို ခိုင်ဘယ်နည်းနဲ့ဖြစ်ဖြစ် ဆပ် ပါ့မယ် ကိုဝင်းရယ်။ ခိုင်သွားတော့မယ်နော်။ အိမ်ကိုလည်း လာခဲ့ပါဦး။ အမေတို့ကတောင် မေးနေသေးတယ်”
“အင်း အင်း”
ခိုင်တစ်ယောက် ပြန်သွားသော အခါ စန်းစန်းထံမှ စကား တစ်ခွန်းထွက်လာ၏။
“အင်း တယ်လည်း ရင်းနှီး နေကြပါလား။ တစ်ယောက်ကလည်း ခိုင်တဲ့၊ တစ်ယောက်ကလည်း ကိုဝင်းတဲ့”
စကားနာ ထိုးမှန်း သိလိုက်ပါ၏။ သို့သော် သူမကြားချင် ယောင်ဆောင် နေလိုက်ရသည်။ ခိုင်သည် မုဆိုးမ မိခင်ကြီးကို နဖူးမှချွေး ခြေမကျအောင် စွန့်စားလုပ်ကိုင် ကျွေးမွေးနေသူ ဖြစ်သောကြောင့် စာနာမိသည်။
“ငွေတင်မကပါ၊ လူပါ လိုက်သွားပြီး လုပ်ကျွေးဖို့ ကောင်းတယ်”
စန်းစန်းက ထိုသို့ ထပ်ပြောသော အခါ သူ သက်ပြင်းချ ရသည်။ စကား အချေအတင်လည်း မပြောချင်။ သို့သော် ထိုအကြောင်းအရာသည် စန်းစန်း အသိဥာဏ်ထဲတွင် လိပ်ခဲ တည်းလည်း ဖြစ်တော့မည်ကိုကား သိလိုက်ပြီ။ ပြီး မိမိနှင့် စန်းစန်း အခြေအနေကလည်း တစ်အိမ်တည်းနေပြီး စီးပွားခွဲ ထားသကဲ့သို့ ဖြစ်နေ၏။
သည်ကြားထဲ မိဘနှစ်ပါး အဆင်မပြေသော ဂယက်က သားသမီးများကိုပါ ကူးစက်သွား၏။ သမီးကြီး ဆိုလျှင် သိတတ်သော အရွယ်သို့ ရောက်ပြီ။ ၁၇ နှစ်ဟူသော အရွယ် သည် အရာရာကို စူးစမ်းနားလည်တတ်ပြီ။ သားသမီး သိမ်ငယ်မှုကိုကား သူအစိုးရိမ်ဆုံး။ ထို့ကြောင်ပင် အိမ်ကို မခင်တွယ်တော့သော်လည်း အိမ်သို့ ကားပြန်ဖြစ်အောင် ပြန်သည်။ အိမ်တွင် နံနက်စာမစားသည်မှာတော့ ကြာပြီ။ စန်းစန်းက လည်း မမေးတော့။ သူကလည်း စကားဟဟ မပြောတော့။ သူသည် ဈေးထဲမှ သူ့ဆိုင်ခန်းကို ရောင်းပစ်လိုက်သည်။မာနဖြင့် ကုန်သည် လောကသို့ အားကြိုးမာန်တက် တိုးဝင်သည်။ သူသည် မီးရထားပေါ်တွင်လည်းကောင်း၊ စက်လှေပေါ်တွင် လည်းကောင်း၊ ကုန်ကားများပေါ်တွင် လည်းကောင်းအနေများ ခဲ့သည်။ တစ်လတွင် အိမ်၌ တစ်ပတ်ပြည့်အောင် မနေခဲ့။ အိမ်တွင် နေရသည်မှာလည်း အိမ်ထောင်ဦးစီးနှင့် မတူ၊ ဧည့်သည် တစ်ယောက်နှင့် တူနေသည်။
“ဖေဖေရယ် သမီးတို့ကို မချစ်တော့ဘူးလားလို့။ မောင်လေးကဆို ဖေဖေတို့ကို မချစ်တော့လို့ အိမ်ပြန်မလာတာ ပေါ့လို့ အမြဲတမ်း ပြောတယ်”
သမီးကြီးက သူစိတ်ကောင်း ၀င်နေသည်နှင့် ကြုံလျှင် ပြောတတ်သည်။
“သမီးတို့ကို ချစ်လို့ ဖေဖေ ပြန်လာသေးတာပေါ့ သမီး ရယ်။ ဖေဖေ့ဘ၀မှာ သမီးနှင့်သား မရှိတော့ဘူး ဆိုရင် ...”
သူစကား မဆက်နိုင်။ မျက်ရည် လည်နေ၏။ သမီးသည်လည်း မျက်ရည်လည်နေလေသည်တကား။ သားကမူ သူ့ကို မျက်တောင်မခတ်ကြည့်နေ၏။ တောင်းပန် တိုးလျှိုးသော မျက်လုံးများမှန်း သူသိသည်။
“မေမေကလည်း ဘာမှန်း မသိဘူးနော်”
သူရယ်နေမိသည်။ ပြီးတော့ မဟောသဓ ဇာတ်ထဲက ၀ိဒေဟရာဇ် မင်းကြီးနှင့် ပုတ်သင်ညိုကို သွားသတိရလေသည်။
“သမီး မဟောသဓ ဇာတ်တော် ဖတ်ဖူးတယ် မဟုတ်လား”
“ဟုတ်ကဲ့ ဖတ်ဖူးပါတယ် ဖေဖေ”
“ပုတ်သင်ညိုကို ကြေးနီပြား ကလေးတွေ လည်မှာ ဆွဲပေးလိုက်ရော ဘာဖြစ်သွားလဲ သမီး”
“အင်း၊ ပုတ်သင်ညိုက ၀ိဒေဟရာဇ် မင်းကြီးကို အလေး မပြု၊ အရိုအသေ မပေးတော့ဘူးလေ”
“အေး ငါလည်း ဓနရှင်ပဲ ဆိုပြီး တုပ ဂုဏ်ပြိုင်ပြီး ဂုဏ်မောက်တာပေါ့ သမီးရယ်။ သမီး မေမေလည်း ဒီအတိုင်းပဲ။ သူလည်း အလုပ် လုပ်ရတယ်ဆိုပြီး ဖေဖေ့ အပေါ်မှာ မယား ၀တ္တရားတွေ ပျက်တာပေါ့ကွယ်”
သူရှေ့ဆက် မပြောချင်တော့ပေ။ စန်းစန်းသည် ခေတ်ပညာလည်း မတတ်၊ ငွေသည်သူမအား ဂုဏ်မာန အဖြစ် သွေးဆောင် ဖျက်ဆီးခဲ့ပေပြီ။ သမီးသည် သူ့စကားကို နားထောင်ရင်း သက်ပြင်းချ၏။
“သမီးတို့ ရှိပါသေးတယ် ဖေဖေရယ်”
သူသည် သမီး၏ ဆံပင်များကို လက်ဖြင့် ဖွကစားကာ ပြုံးလိုက်မိလေသည်။ ရင်ထဲတွင်ကား သောကသည် နွေဖြစ်နေသတည်း။
၎။
ဝိရောဓိကာလများကား ဆုံးခန်းတိုင်ခဲ့လေပြီ။ စန်းစန်း က သူနှင့် ခိုင့်ကို သမုတ်သည်။ စန်းစန်း၏ ဆွေမျိုးများ ကလည်း မြှောက်ထိုး ပင့်ကော်ပြုကြ၏။
“ကျွန်မ ရှင့်ကို စိတ်ကုန်လာတာ ကြာပြီ ကိုတင်ဝင်း။ ကျွန်မကိုလည်း မငဲ့နဲ့၊ သားသမီးတွေ မျက်နှာကိုလည်း မထောက်နဲ့တော့။ အကောင်းဆုံးကတော့ ရှင်နဲ့ကျွန်မ ကိုယ့်လမ်းကိုယ် သွားကြတာ အကောင်းဆုံးပဲလို့ ကျွန်မ ထင်တယ်”
စန်းစန်းပါးစပ်က ထိုစကားများ ထွက်လာသော အခါ သူ တအံ့တသြ မဖြစ်တော့။ တောင်ကျရေကို ကျူရိုးနှင့် အဘယ် သို့တားမည်နည်း။ ပေါက်ဆိန်မိုးကြီးကို ကြာဖက်နှင့် အဘယ်သို့ ကာမည်နည်း။ လေမုန်တိုင်းကို ဇာပ၀ါနှင့် အဘယ်သို့ တားဆီးမည်နည်း။
“ရှင်လည်း ရှင့်ခိုင်နဲ့ရှင် အိမ်ထောင်သစ် ထူချင်ထူတော့။ ကျွန်မကိုလည်း လွတ်လပ်ခွင့်ပေး ဒါပဲ။ သားနဲ့သမီး အတွက် တာ့ ကျွန်မလုံးဝ တာဝန်ယူတယ်”
မာနနှင့် အာဃာတတွင် သန္ဓေတည်ကာ ပြောလိုက်သော စကားများမှန်း သိလိုက်သည်။ ခိုင်နှင့် ယိုးစွပ်သည့် အတွက်မူ သူရင်နာသွားသည်။ သူ၏ ဖြူစင်သော စေတနာ တို့သည် စကားအမနာပ တို့ဖြင့် စွန်းထင်း ကုန်လေပြီ။
“မင်းဆုံးဖြတ်ပြီးပြီလား စန်းစန်း”
“ကျွန်မ ဆုံးဖြတ်ပြီးပြီ”
“အေး ကောင်းတယ်။ မင်းစိတ်ချမ်းသာ စေရမယ်။ မင်း စိတ်တိုင်းကျ ဖြစ်စေရမယ်”
သူသည် နေရာမှထကာ ဗီရိုထဲတွင် သူသိမ်းထားသော ငွေစုစာအုပ် နှစ်အုပ်ကို ယူလိုက်၏။ သမီးအမည်နှင့်တစ်ခု၊ သားအမည်နှင့် တစ်ခုဖြစ်သည်။ ငွေစု စာအုပ် တစ်အုပ်စီတွင် ငွေကျပ်တစ်သောင်းစီ ထည့်ပေးထား၏။ “ကဲ ရော့ ဒါကို မင်းသိမ်းထား။ သားနဲ့သမီး အသက် ပြည့်တဲ့အခါ ထုတ်ပြီးပေးလိုက်။ သူတို့နောင်ရေး အတွက်ပေါ့ကွာ။ ဒီအိမ်ရယ်၊ အို အားလုံး ဆိုပါတော့။ မင်းတို့ သားအမိတွေ ယူထားလိုက်။ သားနဲ့သမီးက ငါနဲ့တွေ့ချင်တယ်ဆိုရင် ဒါမှမဟုတ် ငါက တွေ့ချင်ရင် တွေ့ခွင့်ပေးပါ။ ဒါပဲ ငါတောင်းဆိုချင်တယ်”
သူ့ပါးစပ်က စီကာစဉ်ကာပင် ထွက်သွား၏။ စန်းစန်း မျက်နှာ အိုသွားရာက နှုတ်ခမ်းကို တင်းစေ့လိုက်၏။ မျက်နှာကို တစ်ဖန် ပြန်တင်းလိုက်၏။ သူပေးသော ငွေစု စာအုပ် နှစ်အုပ်ကို ကြည့်ရုံသာ ကြည့်သည်။ မယူ။ သူသည် စားပွဲကလေး ပေါ်တွင် တင်ထားလိုက်ရသည်။ ထိုညဘက်တွင် ကောင်စီ ရုံး၌ ကွာရှင်း ပြတ်စဲကြောင်း လက်မှတ် ရေးထိုးကြသည်။ သမီးကြီးနှင့် သားက ငိုယိုလျက်တားသည်။
“ဟဲ့ မငိုနဲ့၊ မသာအိမ် မဟုတ်ဘူး”
“တောက်”
သူသည် တက်ခေါက်မိသည်။ စိတ်ကို ပြန်ထိန်းလိုက်ရ ၏။ သမီးနှင့် သားကို ၀အောင်နမ်းမိသည်။ သမီးက သူ့ကို ဖက်၍ ကြူကြူပါအောင် ငိုနေလေသည်။
“တိတ် သမီး မငိုနဲ့။ သမီးရော သားရော စာကြိုးစား ဖေဖေလည်း သေသွားတာမှ မဟုတ်ပဲ။ သမီးတို့ တွေ့ချင်ရင် ဖေဖေ လာခဲ့မယ်။ ဖေဖေရှာဖွေလို့ရသမျှ သမီးတို့အတွက်ချည်း ပဲမှတ်။ လူဆိုတာ ခံနိုင်ရည် ရှိရတယ် သမီးရ။ ဆင်းရဲတာကိုလည်း ခံနိုင်ရတယ်။ ချမ်းသာတာကိုလည်း ခံနိုင်ရည်ရှိရ တယ်။ အစ်ကိုကြီးတို့လည်း ကျွန်တော့် သားသမီးတွေကို စောင့်ရှောက်ပါ။ မိဘတွေ အဖြစ် ကျွန်တော် အပ်ပါတယ်”
စန်းစန်းနှင့် သမီးတို့ သားတို့ ပြန်သွားသည် အထိ သူ ကောင်စီရုံးတွင် ငူငူကြီး ကျန်ခဲ့၏။ အားလုံးက နှစ်သိမ့်စကား ဆိုသည်ကို သူ မကြား။ နောက်ဆုံး သူမျက်လုံးအိမ်ထဲမှ မျက်ရည်များ စီးကျ လာသည်ကိုသာ သတိထားမိတော့သည်။ သူ့ငယ်ချစ် စန်းစန်းကို လက်လွှတ် ခဲ့ရပြီ။ ပြီးတော့ သမီးနှင့် သားနှင့် ဝေးကွာခဲ့ပြီ။ ဘယ်သူမပြု မိမိမှုပင် ဖြစ်သည်။ အပ်နှင့်ထွင်းသင့်သည်ကို မထွင်းဘဲ နေခဲ့ရာက အနာရင့်ကာ ပုဆိန်နှင့် ထွင်းခဲ့ရလေပြီ။ အသက်လေးဆယ် ကျော်၍ ဘ၀ကို ပြန်ကြည့်သော အခါ ခြေနှင့်လက်သာ ကျန်တော့သည် ဟူသည်မျိုးဖြစ်၏။
နောက်ဆုံး သူ့ဘ၀ တစ်ခုလုံးကို စီးပွားရေးထဲတွင် နှစ်မြှုပ် ထားလိုက်၏။ မော်လမြိုင်၊ ရေး၊ မြိတ်၊ ထားဝယ်၊ ကော့သောင်တို့တွင် သူကျင်လည်ခဲ့၏။ ၀ိသမ လောဘသမား မဟုတ်သော်လည်း မခံချင်စိတ်ဖြင့် အဖန်ဖန် တလဲလဲ ကြိုးစား ရှာဖွေခဲ့သည်။ စီးပွားလည်း ဖြစ်ပါ၏။ အထီးတည်း နေရသော အခါ သမီးနှင့် သားကို လွမ်းသည်။
ကျွန်တော်သည် တင်ဝင်း ဘ၀ကို တစ်မျှော်တစ်ခေါ် တွေးနေမိသည်။ လူနေမှု စနစ်ကြီးကို အပြစ် တင်ရမည်လား။ ကံမခိုင်ပါဘဲလျက် ဆောက်မိသည့် သံတိုင်ပင်လျှင် ကံမှောက်က ကျိုးသည်တဲ့။ ကံကြမ္မာကို အပြစ်တင်ရမည်လား။ လူသာ အဓိက ဆိုလျှင် လူကို အပြစ်တင် ရမည်လား။
မည်သို့ပင်ဖြစ်စေ ယနေ့အထိ တင်ဝင်းရော စန်းစန်းပါ အထီးကျန် အဖြစ် ဆက်လက် ရပ်တည် နေကြခြင်းကိုကား တစ်နည်း ၀မ်းသာ မိလေသည်။
ကျွန်တော်၏ ဤ၀တ္ထုကို ဖတ်မိ၍ သူတို့ဘ၀ကံကြမ္မာ အလှည့်အပြောင်းကို သံသရာအတွက် ငဲ့စောင်းကြည့်၍ သဘောပေါက် နားလည်ကာ ဆီခန်းမီးစာတို၊ ဘ၀အိုလျှင်၊ မငြိုမငြင်၊ ဖြူစင် မငြူစူ၊ ဖိုးသူတော် တောင်ဝှေး ဘ၀ ကလေးမျိုး တစ်ဖန် မွေးဖွား ပါစေသတည်းဟု...။
မြင့်မောင်မောင်
(ရွှေအမြုတေ မဂ္ဂဇင်း၊ စက်တင်ဘာလ ၂၀၁၀)
