ကိုလူချောတို့ ပြန်လေပြီ

၁၉၈၅ ခုနှစ်၊ မေလထုတ် သဘင်မဂ္ဂဇင်း

ကိုလူချောတို့ ပြန်လေပြီ 
  ဗဂျီအောင်စိုး

ကဗျာဆရာ ဒေါင်းနွယ်ဆွေ မရှိတော့ပြီ။ ဒေါင်းနွယ်ဆွေခေါ် ကျွန်တော့် ငယ်သူငယ်ချင်း အောင်ဆွေ အကြောင်း တစေ့တစောင်း မှတ်မိ သမျှကို ရေးဖို့ အခွင့်အရေး ဖန်လာသည်။
“ဆရာဒေါင်းဟာ အစ်ကို့ သူငယ်ချင်းပဲ။ ပြီးတော့ တစ်ချိန်တည်း တစ်ဆက်တည်း ဆိုသလို ခေတ်ပြိုင် ထွန်းပေါက်လာတဲ့ အနုပညာရှင် နှစ်ယောက်။
နောက် ဆရာဒေါင်းရဲ့ ကဗျာတွေကို အစ်ကို အစဉ်တစိုက် သရုပ်ဖော်ပုံတွေ ရေးခဲ့တာ ဆိုတော့ အစ်ကို ရေးနိုင်ရင် သိပ် အဆင်ပြေမယ်” ဆိုတဲ့ သဘင်မဂ္ဂဇင်း အယ်ဒီတာ အဖွဲ့ရဲ့ အဆိုပြုချက်ကို ကျွန်တော် ငြင်းပယ်ခြင်းငှာ မစွမ်းသာ သဖြင့် သူငယ်ချင်း အောင်ဆွေ့ အကြောင်းကို ခရေစေ့တွင်းကျ အသေး မစိတ်နိုင်ဘဲ တစ်ပိုင်းပုံလောက်မျှသာ ရေးနိုင်သည် ကိုတော့ ခွင့်လွှတ်ကြစေချင် ပါသည်။ အမှန်တော့ အောင်ဆွေ့အကြောင်းကို သည်စာတို စာစမျှလောက်ဖြင့် ပြည့်စုံမည် မဟုတ်ပါ။ တကယ်စေ့ငု လေ့လာ၍ ရေးမည်ဆိုလျှင် စာတစ်အုပ် ကျမ်းတစ်စောင် ဖြစ်လာမည်မှာ မလွဲ။


အောင်ဆွေနဲ့ ကျွန်တော်ဟာ ရန်ကုန်မြို့ အနောက်ပိုင်း လမ်းမတော် သားတွေ ဖြစ်ပါတယ်။ ရန်ကုန် အနောက်ပိုင်းဟာ ဆိုရင် ဟိုတစ်ခေတ် လူမိုက်များ လွှမ်းမိုးချိန်က နာမည်ကြီး လူမိုက် အမြောက်အမြား ထွက်တဲ့အရပ် ဖြစ်ပါတယ်။ ဒါကြောင့်လား မပြောတတ်၊ အောင်ဆွေနဲ့ အောင်စိုးဆိုတဲ့ နှစ်ယောက်ဟာလည်း ခပ်မိုက်မိုက်ပါပဲ။

ဒါပေမယ့် ကျွန်တော်တို့ မိုက်တဲ့ အမျိုးအစားကတော့ ဟိုလူမိုက်ကြီးများ လိုတော့ မဟုတ်ပါ။ ကျွန်တော်တို့မိုက်တဲ့ အမျိုးအစားကတော့ အနုပညာအတွက်၊ ပြည်သူအတွက်၊ ကိုယ့်တိုင်းပြည် ကိုယ့်လူမျိုး အတွက် ကိုယ်စားပြုတဲ့ ခပ်မိုက်မိုက် လုပ်ရပ်တွေပါပဲ။ အောင်ဆွေက ကဗျာတွေ ရေးဖွဲ့တယ်။ ကျွန်တော်က ပန်းချီရေးတယ်။ ငွေရပြီး ချမ်းသာဖို့၊ သူဌေးဖြစ်ဖို့ ဆိုတာတွေ ကျွန်တော်တို့မှာ မရှိပါ။ နားမလည်ခဲ့ကြပါ။ ပြည် သူကို အကျိုးပြုဖို့၊ အလုပ်အကျွေးပြုဖို့ ဆိုတဲ့ ရည်ရွယ်ချက် တစ်ရပ်နဲ့ အနုပညာလမ်းကို ခပ်မိုက်မိုက် လျှောက်ခဲ့ကြသူတွေ ဖြစ်ပါတယ်။ သည်နေရာမှာ အောင်ဆွေက ကျွန်တော့်ထက် ပိုမိုက်တယ်လို့ ဆိုရပါမည်။ အောင်ဆွေသည် နိုင်ငံရေး ခံယူချက်ပါ ပြင်းထန်စွာ ယုံကြည်သူ တစ်ယောက်ပဲ။ ဒါကြောင့်လည်း ၁၉၅၁ ခုနှစ်က သူအထိန်းသိမ်း ခံရသည်။ ကျွန်တော်ကတော့ နိုင်ငံရေး နားလည်သူ မဟုတ်ပါ။ နိုင်ငံရေး ကိစ္စများမှာ ကင်းရှင်းသူ တစ်ယောက်ပဲ။ ဒါပေမယ့် အောင်ဆွေနဲ့ ကျွန်တော်ဟာ အနုပညာ ခံယူချက်ချင်းကျတော့ အတူတူပဲ။ တစ်လမ်းတည်း လျှောက်နိုင်သူတွေလို့ ဆိုနိုင်ပါသည်။ ကျွန်တော်က မော်ဒန်အတ်ကို စရေးကြည့်သည်။ အောင်ဆွေက မော်ဒန်ပိုထရီတွေ စရေးသည်။

အောင်ဆွေ့အနေနဲ့ ကဗျာတွေကို ပီသအောင်၊ ကာရန် မလွတ်အောင် မှန်အောင် ရေးနိုင်ပေမယ့် ကာရန်မဲ့ ကဗျာတွေလည်း ကြိုက်နှစ်သက်တာပဲ။ အောင်ဆွေဟာ အဟောင်းထဲမှာ နစ်မနေဘဲ အသစ်ကိုလည်း လက်ခံနိုင်သူ တစ်ယောက်ပဲ။ ဒီနေရာမှာ ကျွန်တော်တို့ နှစ်ယောက်စလုံးဟာ အသစ်အသစ်သော အနုပညာပုံ သဏ္ဌာန်ကို နှစ်သက်ကြသူချည်းပါပဲ။

အတုယူသင့်သည့် ပိုက်ထွေးထားသင့်သည့် အဟောင်း အဟောင်းများကို မပစ်ပယ်သလို တီထွင်ခြင်း၊ ဖန်တီးခြင်း ပြုရမယ့် အသစ်အသစ်များကိုလည်း ကြိုဆိုကြတာပဲ။ အောင်ဆွေ ကဗျာ အပေါ်ခံယူတဲ့ သဘောထားဟာလည်း အလွန်မတန် ပြင်းထန်သည်။ ခံစားချက် ဟာလည်း ပီပြင် ပြင်းထန် လွန်းသည်။ သူ့ကဗျာ တော်တော်များများတွေဟာ ဒေါသယမ်းအိုးတွေ စုပြုံ ပေါက်ကွဲနေသလို ဒေါသတွေ လွှမ်းနေတာကိုလည်း ဖတ်ကြရပေလိမ့်မည်။ ဒါကြောင့်လည်း ဆရာတက်တိုးက အောင်ဆွေ့ကို Angry Young Poet လို့ မှတ်ချက်ချဖူးသည်။ တစ်ခါတစ်ရံ သူ့အယူအဆတွေဟာ တော်တော်ကြောက်စရာ ကောင်း နေတတ်သည်။ သူ့ကဗျာ အမြောက်အမြားကို ကျွန်တော် သရုပ်ဖော်ပုံများ ရေးဆွဲခဲ့ရဖူးသည်။ သူမသေခင် နောက်ဆုံး ရေးခဲ့တဲ့ ကဗျာတွေ အထိပဲ ဆိုပါတော့။ သည်နေရာ မှာ သူ့ကဗျာ သရုပ်ဖော်ပုံ အများဆုံး ရေးဆွဲပေးခဲ့ရသည့် ကျွန်တော့်ကို သူမှာကြားဖူးတဲ့ စကားများကို သတိရသည်။

“ဟေ့ အောင်စိုး ငါ့ကဗျာတွေ သရုပ်ဖော်ပုံဆွဲရင် ကဗျာ မဆန်စေနဲ့ ကဗျာကို ကဗျာလိုပဲ ဆွဲပေးပါ” တဲ့။ သူ့အမှာစကားကို ကျွန်တော် ချက်ချင်း သဘောပေါက်သည်။ လောကမှာ အလှကဗျာတွေ ရှိကြသလိုပဲ၊ အရုပ်ဆိုးတဲ့ ကဗျာတွေလည်း ရေးကြသီဖွဲ့ကြမှာပဲ။ ရုပ်ဆိုးတာကိုလည်း ပီပြင်အောင် ရေးဆွဲ နိုင်ရင် လှသည်ဆိုတဲ့ သဘောပါပဲ။ အရုပ်ဆိုးတဲ့ ကဗျာအား အရှိကို အရှိအတိုင်း၊ အဟုတ်ကို အဟုတ်အတိုင်း မရေးဆွဲဘဲ ပန်းချီဆရာက လှအောင်ဆိုပြီး စိတ်ကူးယဉ် ရေးလိုက်ရင်တော့ အဲဒီကဗျာ ပျက်စီးမှာ မုချ။

ဒါကို သူဆိုလိုတာပါ။ ကျွန်တော်ကတော့ လှတာတွေ၊ စိတ်ကူးယဉ်တာ တွေထက် အရုပ် ဆိုးတာကို အရှိကို အရှိ အတိုင်း၊ အဟုတ်ကို အဟုတ်အတိုင်းပဲ ရေးဆွဲချင်သည်။ စိတ်ကူးယဉ် ကဗျာဆန်အောင် မရေးဆွဲတတ် ဘူးလေ။ သည်အကြောင်းကို ရေးမည်ဆိုရင် စာရှည်ရှည် တစ်ပုဒ်ဖြစ်နိုင်သည်။ ကဗျာဆန်တာနဲ့ ကဗျာဟာ ကွဲပြားခြားနားကြောင်း ကဗျာ ဖတ်သူများ ရိပ်စားမိကြမှာပါပဲ။ ကြည့်၊ အောင်ဆွေ့ကဗျာတွေထဲ မှာဆိုရင် ခံစားချက်တွေကို အနိဋ္ဌာရုံပဲ ဖြစ်ဖြစ်၊ အရှိကို အရှိ အတိုင်း၊ အဖြစ်ကို အဖြစ်အတိုင်း ရေးဖွဲ့ပြထားတာပဲ။ ဘ၀ခံ စားချက်တွေကို၊ ဝေဒနာတွေကို ကြောက်ခမန်း လိလိဖြစ်လာအောင်၊ မြင်လာအောင် ရေးဖွဲ့သွားတာ များတယ်။ ဒါကို ကျွန်တော် ဘယ်လို စိတ်ကူးယဉ်နိုင်မလဲ။ သူ့ကဗျာတွေဟာ ကျွန်တော့်စိတ်ကို ဘယ်လောက် ချောက်ချားစေသလဲ ဆိုရင် သူက သွေးတွေလို့ ဆိုလိုက်တာနဲ့ ကျွန်တော်က ကျွန်တော့်လက်မောင်းကို သွေးစိမ်းရှင်ရှင်တွေနဲ့ ပန်းချီရေးပြီး “ဟေ့ အောင်ဆွေ ဒီမှာကြည့် ငါ့သွေးအစစ်နဲ့ ရေးထားတာ... ရော့” ဆိုပြီး ပေးလိုက်မိတဲ့ အထိပင် ဖြစ်ပါတယ်။ နောက်တစ်ချက်က ကျွန်တော်တို့ နှစ်ယောက် စလုံးဟာ လက်ဝှေ့ကို ၀ါသနာပါကြသည်။ သိုင်းကစားတာကိုလည်း ကြိုက်နှစ်သက်ကြသည်။ အရင်က အခုလို ကရာတေး၊ အာကီဒို၊ ကွန်ဖူးတို့ သိပ်ခေတ်မစားသေးပါ။

မြန်မာ့သိုင်း၊ ဓားသိုင်း၊ တုတ်သိုင်းလောက်ပဲ သိကြသေးသည်။ အဲဒီအချိန်မှာ အောင်ဆွေက လွမ်းလိပ်ပြာတောင် ဆိုတဲ့ ကဗျာရှည်ကြီး ထဲမှာ မြန်မာ့ဓားသိုင်း အကွက်တွေကို ကွက် ကွက်ကွင်းကွင်း ပေါ်လာအောင် ရေးဖွဲ့သွားဖူးသည်။ မည်မျှလောက် သရုပ်ပေါ်သလဲ ဆိုရင် နားထဲမှာ ဓားခတ်သံတွေ၊ ချွင်ခနဲ ချက်ခနဲတောင် ကြားယောင် လာမိ လောက်အောင်ပါပဲ။ ဒီကဗျာထဲက သရုပ်ဖော်ပုံတွေကို ကျွန်တော်ပဲ ရေးဆွဲပေးရပါသည်။

ကျွန်တော်တို့ နှစ်ယောက်စလုံးဟာ လက်ဝှေ့ ၀ါသနာပါသလို လက်ဝှေ့ပွဲ ကြိုက်ကြသူတွေ ဖြစ်ပါသည်။ နိုင်ငံကျော် လက်ဝှေ့သမားနှင့် နောင် နည်းပြဆရာ ဒိုင်လူကြီး ဖြစ်လာတဲ့သူ တစ်ဦးနဲ့လည်း အင်မတန် ခင်ကြတယ်။ သူကတော့ ကွယ်လွန်သူ ကျားဘညိမ်းပဲ။ ကျားဘညိမ်းဟာ ကျွန်တော်တို့ အိမ်တွေကိုလည်း အခေါက်ပေါင်းများစွာ ရောက်ဖူးသလို ကျွန်တော်တို့ ကလည်း သူ့လက်ဝှေ့ ကြိုးဝိုင်းတွေကို ရောက်ဖူးတယ်။ တခြား လက်ဝှေ့ ကျော်တွေနဲ့လည်း သိကျွမ်းရပြန်တယ်။ အေးကို၊ ကြည်ထွန်း၊ မြေပွေးသိန်းမောင်တို့ပဲ။

တစ်ခါတစ်ခါလည်း ကျွန်တော်ကိုယ်တိုင် လက်ဝှေ့ ဒိုင်လူကြီး လုပ်ခဲ့ဖူးသည်။ အဲဒီအခါမှာ အောင်ဆွေက ကြိုးဝိုင်းအောက်မှာ သူကျွမ်းသည့် ကာရန်တွေ၊ နဘေတွေနဲ့ ရန်သူခေါ် ကြိမ်းချင်းတွေ အော်ဟစ်ပြီး ကြေညာတဲ့သူ ဖြစ်ပြန်ရော။ ကြုံတုန်း ပြောရဦးမယ် ဆိုရင် အောင်ဆွေနဲ့ ကျွန်တော်ဟာ လက်ဝှေ့ ၀ါသနာ ပါရုံမက၊ ကြိုးဝိုင်းထဲမှာရော၊ အပြင်မှာပါ လက်ဝှေ့ ရေးပြခဲ့ဖူးသည်။ နှစ်ယောက်သား တစ်ယောက်နဲ့တစ်ယောက် သိပ်ခင်ကြ ချစ်ကြပေမယ့် မကြာခဏ အကြီးအကျယ် ရန်ဖြစ်ကြပြီး သတ်သည်၊ ပုတ်သည် အထိ ဖြစ်ကြတာပဲ။ ကျွန်တော့် ဘယ်လက်ဖျံမှာ အောင်ဆွေ နှစ်တစ် လက်မတုတ်နဲ့ ရိုက်လို့ သေအထိပါမည့် ဒဏ်ရာကြီးရှိသလို ကျွန်တော်ထိုးလို့ အောင်ဆွေ နှာခေါင်းရိုးကျိုးသွားတာ သူသေတော့ ပါသွားရောပဲ။

ကျွန်တော်တို့ဟာ တစ်ယောက်နဲ့ တစ်ယောက် သိပ်ချစ် ကြတဲ့ သူငယ်ချင်းတွေပဲ။ ဒါက မမူးခင်။ အရက်ဝင်လို့ မူးပြီ ဆိုတာနဲ့ ချစ်တာတွေ ဘယ်ရောက်ကုန်မှန်း မသိတော့။ သူသေကိုယ်သေ ရိုက်ကြ သတ်ကြ တော့တာပဲ။ ဖြစ်တုန်းက ဖြစ်ကြပေမယ့် ပြီးသွားရင် နှစ်ယောက်သား ဖက်ငိုချင် ငိုကြတာပဲ။ အောင်ဆွေ၊ အောင်လင်း၊ အောင်စိုးတို့ သုံးယောက်ဟာ အောင်သုံးအောင်ပဲ။ အနုပညာ ခံယူချက်တွေက ပြင်းထန်သည်။ မိမိတိုင်းပြည်နဲ့ မိမိလူမျိုးကို အသည်းထဲနင့်အောင် ချစ်ကြသူတွေ။ ဘယ့်နှယ်ဘယ့်နှယ့် လူမိုက်တွေဖြစ်ကုန်ကြ သလဲ မသိတော့ပါ။ ဆရာဦးသုခက မိုက်တယ်ဆိုတာ လွယ်ပါတယ် ဆိုပြီး ကား တစ်ကားရိုက်တယ်။ မကြည့်လိုက်ရလို့ ကားအကြောင်းတော့ မသိပါ။ ကျွန်တော့် အဖို့တော့ “လိမ္မာတယ် ဆိုတာ လွယ်ပါတယ်” လို့ပဲ ကားတစ်ကား ရိုက်ချင်တယ်။ မိုက်တယ်ဆိုတာ အင်မတန်မှ ခက်ပါတယ်။ မလွယ်ပါဘူး။ မိမိကိုယ်တိုင် မမိုက်ဖူးရင် မိုက်တယ်ဆိုတာ လွယ်ပါတယ်လို့ ထင်မှာပါ။ လိမ္မာတယ် ဆိုတာကတော့ ကျွန်တော်တို့ ငယ်စဉ်က မိုက်ချင်တိုင်းမိုက်၊ ဆိုးချင်တိုင်း ဆိုးပြီး ပေတေခဲ့ ပေမယ့် အခု ကျွန်တော်တို့ လိမ္မာကြပါပြီ။ သုံးယောက်စလုံး ပုတီးတွေ ကိုယ်စီနဲ့ ဖြစ်ကုန်ကြ ပါပြီ။

သည်အခါကျမှပဲ အောင်ဆွေနဲ့ အောင်လင်းတို့ မရှိတော့ဘူး။
အောင်လင်းလည်း သေပြီ။
အောင်ဆွေလည်း သေပြီ။
ကျွန်တော် တစ်ယောက်တည်း ကျန်နေရတဲ့အခါ သူတို့ နှစ်ယောက်စလုံးကို တမ်းတရပါသည်။ သည်တော့မှ အဖော်ဆိုတဲ့ အနှစ်သာရကို လေးလေးနက်နက် သဘော ပေါက်ရပါသည်။ အထူးသဖြင့်ကတော့ ကျွန်တော်နဲ့ နှစ်ကိုယ့်တစ်စိတ် အောင်ဆွေကို ပိုလို့ တမ်းတရတယ်။ အောင်ဆွေဟာ ကျွန်တော် ဆေးရုံအစုံ လျှောက်တက်နေရတဲ့ အချိန်မှာ ကျွန်တော် သေရင် ကျွန်တော့်အကြောင်း ရေးဖို့ဆိုပြီး ရောက်ရောက်လာ တတ်တယ်။ အခု သူ ဆေးရုံ ရောက်နေတဲ့ အချိန်မှာ ကျွန်တော့် ဇနီးကိုမှာတယ်။ ကျွန်တော် လာမကြည့်ပါ စေနဲ့တဲ့။ သူ နေကောင်း ပါတယ်တဲ့။ ကျွန်တော်က သူ့လောက် စိတ်ဓာတ် မခိုင်မာဘူး။ ၀မ်းနည်းတတ်လို့ နေမှာပါပဲ။

ကျွန်တော် သေရင် ကျွန်တော့် အကြောင်းရေးမယ် ဆိုတဲ့ အောင်ဆွေကတော့ ကျွန်တော့်အကြောင်း ရေးမသွားနိုင်ရှာ တော့ဘူး။ ကျွန်တော်ကသာ သူ့အကြောင်း ရေးနေရပြီ။
ကျားဘညိမ်း...
အောင်လင်း...
အောင်ဆွေ၊ မင်းဏီ စတဲ့ ကိုလူချောတို့ကတော့ တစ်ယောက်ပြီး တစ်ယောက် ပြန်နှင့်ကြပြီ။
အောင်ဆွေရေ...
မင်းရေးတဲ့...
အလှကိုရှာ
ဘယ်မှာမှမတွေ့။

တစ်နေ့ အချိန်တန်တော့
ဆူညံညံ ငိုသံကြားရတယ်
ရထားရွေ့ရွေ့။ ။

နောက်ဆုံးရထား ကဗျာလေးလိုပဲ မင်းရဲ့ နောက်ဆုံး ရထားကတော့ တရွေ့ရွေ့ ထွက်ခွာသွားပြီ။ အလိမ္မာ ကြွယ်ဝလှတဲ့ လူ့လောကထဲမှာ ကျန်ရစ်ခဲ့တဲ့ အသက် ခြောက်ဆယ်ကျော် လူမိုက် အဘိုးကြီးကပဲ လက်ပြ နှုတ်ဆက် လိုက်ရပါတယ် သူငယ်ချင်းရေ...။




ဗဂျီအောင်စိုး