သည်တန်ဆောင်နှင့် ညီမောင်

သည်တန်ဆောင်နှင့် ညီမောင်
ဝင်းဦး

သည် တန်ဆောင်တွင် ပျော်ရွှင်စရာ အချစ် ပုံပြင်ကလေး တစ်ပုံ ပြောစမ်းပါဟု အစ်ကိုလေးက ဆိုသည်။ “အချစ် ဆိုတာမှာ ကြည်နူး စရာတွေ အပြည့် ရှိပါသေးတယ် ဆိုတဲ့ အကြောင်းကို လှလှကလေး ဖွဲ့ပြစမ်းပါ” ဟုလည်း အစ်ကိုလေးက တဖွဖွ တိုက်တွန်းသည်။

ညီမောင် ပြောခဲ့သမျှ ပုံပြင်တွေမှာ ချစ်သဲတွေ မွမွကြေကြ ရသည်နှင့် အဆုံးသတ်ခဲ့ သည်ချည်း ဖြစ်၍ အချစ်ကို မျက်မှန်စိမ်းကြီး တပ်ကြည့်လေ့ ရှိသူဟု အစ်ကိုလေးက သမုတ်ချင် ဟန်ရ၏။ မသိ မဟုတ်၊ ညီမောင် ကျော်လွှားခဲ့ ရသော ဘ၀လမ်း ခရီးကြမ်းကို အစ်ကိုလေး သိ၏။ မမှန်မဟုတ်၊ ညီမောင် ငိုပြခဲ့သော မျက်ရည် စီးချောင်းသည် နှလုံး သည်းပွတ်မှသာ စီးယို ထွက်သော သောက မျက်ရည်တို့ အကယ်တိ အစစ်အမှန် ဖြစ်ခဲ့သည်။ သို့သော်လည်း အစ်ကိုလေးက ပြည်ဖုံးကား တစ်ခါချ၍ ပျော်စရာ ပျော်စရာ ကလေးများ အကြောင်း ပြောပါဦးဟု တိုက်တွန်းလာသည်။

“မျက်လုံးက ပြုံး၊ နှုတ်ခမ်းကလည်း ပြုံးပြီး၊ ပျော်ရွှင်စရာနဲ့ အဆုံးသတ်တဲ့ ပုံကို သည်တန်ဆောင်မှာ ညီမောင် ပြောစမ်း”

အစ်ကိုလေးက ထပ်ကာ တလဲလဲ တိုက်တွန်းသဖြင့် ပြောရဦးမည်။ အဆုံးသတ်သော အခါ ကျလျှင်သာ ညီမောင်ကို အစ်ကိုလေး အပြစ်မတင် စေလိုပါ။
သို့သော် အစ်ကိုလေး ပြုံးရမည် မုချဟု ညီမောင် အာမခံ ရဲသည်။ တစ်ခုသာ ရှိပါသည် အစ်ကိုလေး၊ အစ်ကိုလေး၏ အပြုံးသည် သနား ပြုံးကြီး ပြုံးနေမှာကိုတော့ ညီမောင် မြင်ယောင်ပါသေးသည်။

x x x

တန်ဆောင် ဆီမီးတွေ ထိန်ထိန်ငြီး နေသည့် ရွှေတိဂုံ ရင်ပြင်သို့ အစ်ကိုလေးတို့ ဖိတ်၍ ညီမောင် လာခဲ့ရသည်။ ဘန်ကောက် လုံချည် တိုက်ပုံ အင်္ကျီတွေနှင့် ဖြစ်၍နေ သော ညီမောင်ကို အစ်ကိုလေးတို့ကပင် မမှတ်မိချေ။ ရင်ပြင်တော်ပေါ် ပုဆိုး လျှောကျပြီး ချော်လဲမည် ကိုလည်း ညီမောင့်မှာ စိုးရိမ်စိတ် ဖြာနေမိသည်။ သည်အ၀တ် အစားတွေ ၀တ်ပြီးသည် ပတ်ဝန်းကျင်ကို မရောက် ဖြစ်သည်မှာ ပြန်လည် တွက်စစ် ကြည့်လျှင် ၁၃ နှစ်၊ ၁၄ နှစ်လောက်ပင် ရှိပြီဖြစ်ကြောင်း အစ်ကိုလေးလည်း သိ သည် မဟုတ်လား။

ဘ၀တစ်ခု စွန့်လျှင် ညီမောင်သည် အရိုးရော အရင်းပါ စွန့်တတ်ပါသည်။ ညီမောင်လို လူမျိုးများသည် မဇ္စျိမ ပဋိပဒါကို နားမလည်သော သူမျိုး ဖြစ်ကြပါသည်။ ရင်ကို ဖွင့်မထား တတ်သောကြောင့် သိုသိပ်စရာ တွေကိုလည်း ပြန်မထုတ်တတ်ဘဲ သေတစ်ပန် သက်တစ်ဆုံး သိမ်းထား တတ်ကြသော သူများလည်း ဖြစ်ပါပေသည်။ ထို့ကြောင့်ပင် သူများ တကာတွေ တစ်ကြိမ်မျှ သာမက ကျသော အိပ်မက်များကို အခါခါပြန်မက်မိ ကြခြင်းဖြစ်ပါသည်။ အစ်ကိုလေး။

ထို့ကြောင့်ပင် သည်ပုံပြင်မျိုးကို ဂဃနဏ တစ်လုံးမကျန် ပြန်ပြောနိုင်ခြင်း ဖြစ်ပါသည်။ ညီမောင်တွင် အမြဲအစဉ် ခြောက်လှန့်နေသော အိပ်မက် ဆိုးကြီးများ ရှိနေ ခဲ့ပါသည်။ သည်းခံပါအစ်ကိုလေး။ အိပ်မက်ဟု ဆိုသော်လည်း ယခုပြောမည့် အကြောင်းမှာမူ အစ်ကိုလေး လိုချင်သော ပျော်ရွှင်စရာတွေ တင်းပြည့် ပါပါသည်။ စိုးရိမ်ဖွယ်ရာ မရှိပါ။

“ဟောဒီ အဆိုတော် နာမည်က ၀င်းအောင်တဲ့။ သူက သူများထက် ထူးခြားတယ်။ သီချင်းကို တစ်နှစ်မှ တစ်ခါပဲ ဆိုတယ်။ ဆိုတော့လည်း ကျွန်တော်တို့ ၀ိုင်းနဲ့မှ ခင်ဗျ။ ဆိုပြန်ရင်လည်း ခဲတစ်လ လောက်တော့ ကျတာချည်းပဲ”

အစ်ကိုလေးက သူတို့ တီးသော တန် ဆောင်းတွင်းသို့ ညီမောင် အရောက်တွင် ဤသို့ မိတ်ဆွေ သင်္ဂဟများနှင့် မိတ်ဆက် ပေးပါသည်။
“ကဲ ကဲ လူများလွန်းလို့ ဖိုးဝင်း အောင်ရာ တစ်ပုဒ်လောက် ဆိုလိုက်စမ်းပါ။ ဒါမှ လူရှင်းသွားအောင် ဟုတ်လား”

“၀ိုင်းခေါင်းဆောင် မောင်ကိုကိုကလည်း ညီမောင့်ကို နောက်ပြောင် ပြန်ပါသည်။ အစ်ကိုလေးတို့ အဖွဲ့နှင့် တွေ့မှဖြင့် ဆယ့်နှစ်ရာသီ ပျော်စရာတွေချည်း ဖြစ်ပါသည်။ ညီမောင့်ကို အစ်ကိုလေး တို့က စ၍ ပြောင်၍ ကောင်းသည်ဟု စွဲမှတ် ထားကြရကား လူရှေ့မရှောင် သူရှေ့မရှောင် ဆိုနေ ပြောနေကျ ဖြစ်ပါသည်။ ထို့ကြောင့်ပင် တကယ်ဟု ထင်မှတ်၍ စန္ဒရားခုံ အနီးတွင် ထိုင်နေသော အဆိုတော် ကလေး တစ်ယောက်က နေရာ ဖယ်ပေးရာ ညီမောင့်မှာ မသိမသာ ပြုံးရပါသေးသည်။ ပြီးမှ
“ဖိုးဆိုချင်ပဲ အစ်ကိုလေးတို့ရာ။ ဆိုမှပေါ့။ ဘုရားပေါ် ရောက်ပြီး ပြန်သာ ဆင်းသွားရော ဘုရား မဖူးဖြစ်ဘဲ နေမှာစိုးလို့ ညီမောင့် မွေးနံဒေါင့်မှာ သွားဦးချပြီး ပြန်လာခဲ့မယ်” လို့ ပြောရကာ မျက်စေ့ မှိတ်ပြပြီး ပြန်ထွက်ခဲ့ရပါ၏။

ရင်ပြင်တော်ကား လူသူ အများနှင့် ပြည့်ကျပ် အပ်ချစရာ မရှိသလောက် ဖြစ်၍ နေလေသည်။ ကြုံတောင့် ကြုံခဲ မသိုး သင်္ကန်း ဆင်နွှဲမည့် သူများမှာလည်း တက်လာမစဲ တသဲသဲပင် ဖြစ်ပါလေသည်။ပိုးဖဲ ကတ္တီပါ၊ နိုင်လွန်၊ တာဖီတာတို့ကို ဝေဆာ သိုက်မြိုက်စွာ ၀တ်စားဆင်ယင် လာကြသော သူများသည် ကုန်းတော်မှ အပြန်တွင် ဇာတ်လမ်း တစ်ပုဒ်စီ ယူဆောင် သွားကြမည့် သူများသာ များလှ၏။ ဘာသာရေးပွဲ ဆိုသည်မှာ ဖရဏာပီတိ ကြည်နူးစိတ်တွေ အိပြီး တစိမ့်စိမ့် ဆင်းကာ ဘ၀င် သိမ့်ရမည့် ပွဲသာ ဖြစ်ပါသည်။ “ပျော်သည် ပျော်သည် သူနဲ့ တွေ့လို့ ပျော်ရသည်။ သူနဲ့ တွေ့လို့ ပျော်ရသည်” ဟူသော သီချင်းမျိုး ဆိုကာ ပန်းမွေ့ရာ ရွှေကော် ဇောရောနှော၍ ထိုင်ကောင်းသော ပွဲမျိုး မဟုတ်ပါ။ ယခုမူ လူအုပ်သည် တဟေးဟေး တ၀ါးဝါး ပျော်ကြသည်သာ ဖြစ်ပါသည်။ ပျော်စရာကို ရှာရမည့် အခါကြီး ဟုသာ ထင်မှတ်နေပါ၏။ ထိုအထဲတွင် ညီမောင်သည်လည်း တစ်ယောက် အပါအ၀င် ဖြစ်၍ နေခဲ့ရပါ၏။ ကြုံတုန်း ကြုံခိုက်ကျမှ ဘုရားကို ရိုသေ ကိုင်းရှိုင်းသည် ဟူ သည်ကား ကောင်းလှသော စိတ်မျိုး မဟုတ်ကြောင်း ညီမောင် သိပါသည်။ သိလျက်နှင့်ပင် ကြမ္မာ ငင်ချင်သော ညီမောင်သည် မွေးနံဒေါင့်တွင် ၀င်၍ ၀တ်ပြုလိုက်မိ၏။

အော်ကျယ်ဟစ်ကျယ် ဘုရား ရှိခိုးသော ဘေးက ဦးသူတော်ကြောင့် ညီမောင်လည်း ဆက်လက်၍ အာရုံ မပြုတော့ဘဲ နေရာမှ ထလိုက် ရပါသည်။ ထိုအခါကျ မှပင် ညီမောင်၏ ရင်သည် ထိတ်ကနဲ ခုန်၍ သွားကာ ခြေလှမ်း မရွေ့မိဘဲ ရှေ့သို့ ငေးငေးကြီး ကြည့်နေမိပါသည်။
“၀င်းအောင် မဟုတ်လားဟင်။ သူငယ်ချင်း နေနိုင်လိုက်တာကွာ။ မင်းနှယ် ဒို့ရန်ကုန်မှာ ပြန်ရောက်နေတာ သိရက်နဲ့ လာမတွေ့ဘူး”

“ဟုတ်ပါရဲ့ ကိုဝင်းအောင်ကလည်း တူတူတို့မှာလေ၊ သားသားတွေ သုံးယောက်တောင် ရနေပြီ သိလား။ ကိုယ့်တူတော် မောင်တွေ လာကြည့်စမ်းပါဦး”

ကိုယ့်မျက်နှာကို မြင်မှပင် ၀မ်းသာ အယ်လဲ နှုတ်ဆက်ကာ ချဉ်းကပ် လာကြသူ မောင်နှံစုံကို ညီမောင် မည်သို့ စကား ပြန်ရမှန်း မသိဘဲ ကြောင်အအ ဖြစ်၍ နေပါ သည်။ သူတို့ကား ညီမောင်၏ အချစ်ဆုံး သူငယ်ချင်း လင်မယား ဖြစ်သည်။ သူတို့နှင့် မတွေ့တော့သည်မှာလည်း ၁၀ နှစ်၊ ၁၂ နှစ်ခန့်ပင် ရှိ၏။ ညီမောင့် ဘ၀တွင် မေ့ထား ခဲ့ရသည့် အစိတ်အပိုင်းတွင် သူတို့လည်း ပါဝင်ခဲ့၍ ညီမောင် မေ့ထားခဲ့ ရသည်မှာ ကြာပြီ။ ယခုမှ ပြန်တွေ့သော အခါ ညီမောင်မှာ ၀မ်းသာ ၀မ်းနည်းကြီး ဖြစ်၍ နေပါသည်။ ဆွေမြင့်နှင့် တူတူလှကား ယခင်ကထက် အနည်းငယ် အသားတက်၍ ၀ဖြိုးသယောင် ရှိနေကြသည်မှ အပများစွာ ပြောင်းလဲခြင်း မရှိကြချေ။

“မင်းတို့ အင်္ဂလန်က ပြန်ရောက်တယ် ဆိုတာ ကြားပါတယ်ကွာ။ ငါလည်း ပရိယေသန ၀မ်းစာ အတွက် အလုပ်များ နေလို့ပါ။ မကြာခင် လာခဲ့ဦးမယ် စိတ်ချ”

ဆွေမြင့်နှင့် တူတူလှသည် ညီမောင်ကို အကဲခတ်သလို ကြည့်လိုက်ကြပြီးမှ “၀င်းအောင်ကြီး ခုထက်ထိ တစ်ကိုယ်ထဲပဲ လားဟ” ဟု စူးစမ်းသမှု ပြုကြလေသည်။ ညီမောင်က ခေါင်းညိတ်ပြသော အခါ တူတူ လှက “မိန်းမ ခိုးပေးတာမှ တော်တဲ့ လူတွေဟာ ကိုယ့်အတွက်ကျ မစွံတတ်ဘူး ဆိုတာ မှန်နေတာပေါ့”ဟု ရယ်ရယ်ရွှင်ရွှင် ကလေး ပြောလိုက်ပါသည်။ သည့်နောက် သူတို့ လင်မယားသည် တစ်ယောက် မျက်နှာတစ်ယောက် ပြန်ကြည့်ပြီး အသံထွက် အောင် ရယ်လိုက်ကြပါလေသည်။ ညီမောင်မှာလည်း ရောယောင် သွေးသောက် ပြုံးနေလိုက်ရ၏။

“တို့တတွေရဲ့ ဘ၀ကို ပြောင်းပေးလိုက်တဲ့ တန်ဆောင်တိုင်ပွဲကို မင်း သတိ အမြဲရနေမှာပဲ မဟုတ်လား ၀င်းအာင်”


ဆွေမြင့်က ညီမောင်ကို မေး၏။ ညီမောင်လည်း ခေါင်းညိတ် ပြလိုက်ရသည်။
တူတူလှက ၀ဲယာသို့ မျက်လုံး ကစားလိုက်ပြီးလျှင် “ဘယ်သူမှ မပါရင် တူတူတို့နဲ့ ရင်ပြင်ပေါ် လျှောက်ပါ ဦးလား ကိုဝင်းအောင်”ဟုမေးစမ်းပြီး အဖော် ခေါ်လေသည်။
ညီမောင်လည်း သူတို့ လင်မယား နှစ်ယောက်နှင့် အတူ ဖြည်းဖြည်း သာသာ လမ်းလျှောက်ရ ပြန်ပါ၏။ လမ်းလျှောက် ကြရာတွင် တူတူလှသည် အလည် ကနေပြီး ကလေးငယ်သဖွယ် ဆွေမြင့်နှင့် ညီမောင်၏ လက်ဖျား ကလေးမျာကို တစ်ဖက် တစ်ချက်စီ ကိုင်ဆွဲ၍ လာပါသည်။ တစ်ချိန်လုံးမှာလည်း ဆွေမြင့်က တစ်လှည့် တူတူလှက တစ်လှည့် “မှတ်မိသေးရဲ့လား ၀င်းအောင်၊ မှတ်မိသေးတယ်နော်” အစ ချီကာ ချီကာဖြင့် ရှေးဟောင်း နှောင်းဖြစ်တွေ မှောက်သွန် အန်ချပြော လာကြပါသည်။

ထိုရောအခါ ညီမောင်မှာလည်း သူတို့ အငွေ့ ပတ်ပြီး လန်းဆတ် ကြည်မွေ့၍ နေမိပါ၏။ သို့နှင့် ညီမောင် တို့သုံးယောက်သား အစ်ကို လေးတို့ရှိသည့် တန်ဆောင်းရှေ့သို့ တစ်ပတ်ကျော့ ရောက်၍ လာ၏။ အစ်ကိုလေးသည် ညီမောင်ကိုသာ မြင်ပြီး ညီမောင်၏ အဖော်သစ်များကို မမြင်သဖြင့် “ဟေး ၀င်းအောင် ငါ့ညီလာ သီချင်းဆိုဟေ့ အလှည့်ရောက်ပြီ” ဟု ရွှင်ရွှင်မြူးမြူး လှမ်းအော်ခေါ်ရာ၊ ဆွေမြင့်နှင့် တူတူလှသည် “အမယ် ၀င်းအောင်ကြီးက အဆိုတော်တွေ ဘာတွေ ဖြစ်လို့ပါလား။ ကိုယ်တို့လည်း နားထောင်မယ်ဟေ့” ဟု ညီမောင်၏ ဆန္ဒကိုပင် မမေးတော့ဘဲ တန်ဆောင်းတွင်း လိုက်ဝင်ကြပါ၏။ ဤတွင် ညီမောင်လည်း “ဂီတညီနောင်၊ ဗိုလ်က လေးတင့်အောင်နဲ့ မောင်ကိုကို ဆိုတာပါပဲ” ဟု ငယ်သူငယ်ချင်း များနှင့် မိတ်ဆက်ပေး ရပါသည်။ ပြီးနောက် သီချင်းဆိုရန် ဟန်ပြင်ရ၏။

“၀င်းအောင်ရေ မင်းရသေးရင် ငါတို့ ကောလိပ်တုန်းက နေ့ကျောင်းသား အသင်းနဲ့ ဆီမီး ပူဇော်တုန်းက သီချင်းကို ဆိုပါလားကွာ”

ဆွေမြင့်က ကောက်ခါ ငင်ခါ တိုက်တွန်း၍ တူတူလှက ခြွင်းချက်မရှိ ထောက်ခံသဖြင့် အစ်ကိုလေးကို နောက်မှလှိမ့်လိုက် ပေးရန် ပန်ကြားပြီး ညီမောင်လည်း သီချင်းဟောင်းကို ညည်းရပါသည်။
“သီတင်းဝါ လကုန် ကျွတ်ခဲ့ပြီ မီးထွန်း ပွဲတော်သည် ရာသီ မြန်မာပြည်၊
သြော် မြို့ရွာတိုင်းမှာ”

မေ့နေသော အပိုဒ်များတွင် တူတူလှက ထောက်ပေးသေး၏။
“နေ့ကျောင်းသူများ နေ့ကျောင်းသားများ ပါရမီ၊ ဒါနသီလ ဒွန်တွဲလို့သာ အတည်၊ နန်းနိဗ္ဗာန် မှန်းကာ ရည်ရွယ်ကြတော့သည်။ ယူနီဗာစတီ တက္ကသိုလ် ကျောင်းတော်ဆီ စံနမူနာ ရှေ့ဆောင် ပြပါမည်”

ဆိုလိုက်တော့လည်း ကိုမောင်ကို၏ ကျွမ်းကျင်သော အတီးကြောင့် ဖြောင့်ဖြူး၍ အာတွေ့သယောင် ရှိ၍ နေပါသည်။ ဆွေမြင့်နှင့် တူတူလှကား ရှေးက အကြောင်းစုံ တွေကို စားမြုံ့ပြန် နေကြဟန် တူ၏။ ငြိမ်ချက်သား ကောင်းလှပါသည်။ ညီမောင်မှာ မူကား မရေရာသော ဝေဒနာ တစ်မျိုး ရင်ထဲတွင် တလှပ်လှပ် ပေါ်၍ နေပါ၏။ အနေရ အထိုင်ရလည်း ကျပ်လှပါသည်။ လူပုံ အလယ်မှာ တင့်တောင့်တင့်တယ် ထည်ထည်ဝါ၀ါ မနေသည်မှာ ကြာပြီဖြစ်၍ ပရိသတ်၏ အာရုံစိုက်ရာ အလယ်ဗဟို ဖြစ်နေ မှန်းရိပ်မိသော အခါ စည်းဝါတွေပင် ချွတ်ယွင်းလုလု ဖြစ်၍ ဖြစ်၍ သွားမိသေး၏။ ထိုအခါများတွင် ဘေးကထိုင်၍ အားပေးနေသော အစ်ကိုလေးက ပြုံးပြ၍ အားပေး၏။ ဆွေမြင့်ကလည်း ညီမောင်၏ လက်တစ်ဖက်ကို နွေးနွေး ဆုပ်ကိုင်ထား ပါ၏။ သည်သူငယ်ချင်းကား ယခုအထိ ညီမောင့် အပေါ် အချစ် မပြယ်ရှာသေးပါ။ ဝေးသော်လည်း သွေးအေးသည် မဟုတ်ကြောင်း ဆွေမြင့်၏ လက်ဖ၀ါးမှ သွေးပြန်ကြောတို့က သွေးတိုး မြန်မှုဖြင့် သက်သေ ပြပါသည်။ ထိုအခိုက် “ဟင့်”ကနဲ ရှိုက်သံတစ်ချက် ကြားလိုက်ရသဖြင့် ညီမောင်လည်း ရပ်ပစ်လိုက်ကာ လှည့်ကြည့်မိ၏။ တူတူလှသည် မျက်ရည် ကလေးစို့စို့နှင့် မော့ကြည့်၏။

“ဟော လုပ်ပြီ။ မိရွှေတူတို့ ကတော့ ၀မ်းသာတဲ့ မျက်ရည်တွေ ထွက်ပြန်ပြီ”

ဆွေမြင့်သည် အားသော လက်တစ်ဖက်နှင့် သူ့ဇနီးချောကို ပုခုံးကလေး ဖက်ကာ တယုတယ မာန်လိုက်၏။ ညီမောင်ကမူ တူတူလှ၏ သဘောကို ငယ်ငယ်ကတည်းက သိပြီး ဖြစ်၍ ပြုံးရုံသာ ပြုံးနေလိုက် ရလေသည်။ တူတူလှကမူ ရှက်ကိုး ရှက်ကန်းဖြင့် ဆွေမြင့်ကို တစ်လှည့် ညီမောင့်ကို တစ်လှည့် မျက်လွှာ ခတ်ရင်း ကြည့်လိုက်ကာ
“မောင်တို့ တူတူတို့ဟာ ကိုဝင်းအောင်နဲ့ ရေစက်ကို ဆုံတယ်နော်။ ဟိုးငယ်ငယ်က တန်ဆောင်မုန်း လပြည့်နေ့က အကြောင်းကို ပြန်တွေးကြည့်တော့ တူတူ ကြည်နူးမိတယ်။ အဲဒီတုန်းကသာ မတော်တဆ မောင်နဲ့ တူတူ ကွဲသွားခဲ့ရင် ဒုက္ခပဲ”ဟု ကြောင်စီစီကလေး ပြော၍ နေပြန်၏။
“အေးလေ ခုတော့ မကွဲတဲ့ အပြင်၊ ၀င်းအောင်ကြီး ကျေးဇူးကြောင့် မောင်တို့ ဒီအခြေ ရောက်လာတာပဲ မဟုတ်လား”

တူတူလှက ညီမောင်ကို ရှက်သလိုလို မျက်စောင်းထိုး လိုက်ပြန်၏။ ညီမောင်က မလုံမလဲ “အဟဲ”ကနဲ ရယ်လိုက်သော အခါ ဆွေမြင့်က ညီမောင်ခေါင်းကို တစ်ချက်ပုတ် လိုက်လေသည်။ အစ်ကိုလေးတို့ကား ညီမောင်တို့ သုံးယောက်၏ ချစ်ခင် ယုယပုံကို အားပါးတရ ငေးကြည့် နေကြလေသည်။
ထိုအခိုက် “ဟဲ့ သားနဲ့ သမီးတို့၊ ငါ့မြေးတွေက အောက်မှာမီးပွဲ လှည့်ကြည့်ချင်လို့တဲ့ တပူပူ၊ တဆာဆာနဲ့ဟာ မင်းတို့က ဒီရောက်နေကြတာကိုး” ဟူသော အပြစ်တင် သံနှင့် အတူ တန်ဆောင်းတွင်းသို့ လူကြားထဲမှ တိုးဝှေ့ ၀င်လာကာ ပြောလိုက်သော အသံကြောင့် အားလုံးသည် အသံ လာရာသို့ လှည့်ကြည့်ကြ၏။ ညီမောင် တစ်ယောက်သာ ခေါင်းမမော်ဘဲ နေမြဲတိုင်း နေလိုက်ပါသည်။ ကြည့်စရာ မလိုဘဲ ၀င်လာသူ မည်သူမှန်း ညီမောင် သိပါသည်။

“မေမေ ဒါသမီးတို့ သူငယ်ချင်း ကိုဝင်းအောင်လေ၊ မမှတ်မိတော့ဘူးလား”တူတူလှက ပြောလိုက်သံကို ညီမောင် ကြားရ၏။
“သိပါအေ့ ကဲ လာသွားမယ်။ မောင်ဆွေမြင့်ရေ မင်းသား အငယ်က မီးပန်းတွေလည်း ၀ယ်ခဲ့ ပါတဲ့ကွယ်။ ကဲသွားမယ်”

မော်မကြည့်သော်လည်း မကျေမချမ်း မျက်စောင်း တစ်ချက် ထိုးလိုက်သည့် ဒဏ်ကို ညီမောင် ခံလိုက်ရမှန်း နားလည် လိုက်ပါ၏။ ဆွေမြင့်ရော တူတူလှပါ နေရာမှ ဖြေညှင်းစွာ ထကြ၏။ ပြီးနောက် ဆက်ဆက် လာလည်လှဲ့ပါရန် အထပ်ထပ် ဖိတ်ကြားပြီး တန်ဆောင်းတွင်းမှ လှည့်ကြည့် လှည့်ကြည့်နှင့် ထွက်ခွာ သွားကြပါ သည်။ သည်ကနေ့ကျမှ တစ်ပတ် ပြန်လည် လာသည့် ရာဇ၀င် တစ်ပတ် နွမ်းပေကိုး။

ကိုမောင်ကိုက စန္ဒရားကြောင့် ရှောက်တဂိုးဂိုး တဂွမ်းဂွမ်း လုပ်ပစ်လိုက်မှ ညီမောင်လည်း ငိုင်နေရာမှ ဗြုံးကနဲ ထကာ အစ်ကိုလေးဘက် လှည့်၍ “ပြန်ဦးမယ် အစ်ကိုလေး”ဟု တုံးတိကြီး နှုတ်ဆက်လိုက်ရသည်။ အစ်ကိုလေးက “ဇာတ်လမ်း တစ်ပုဒ်တော့ ရှိနေတယ်နဲ့ တူတယ်။ ဟုတ်လား ညီမောင်”ဟု တိုးတိုးမေး၏။ ညီမောင် ဆိတ်ဆိတ် နေခြင်းဖြင့် ၀န်ခံ လိုက်ပါသည်။

“ကဲ ဒါဖြင့် သည်တန်ဆောင်မှာ ညီမောင်က အစ်ကိုလေးကို အချစ်ပုံပြင် တစ်ပုံ ပြောပြပါလားကွာ၊ တစ်ခုတော့ ရှိတယ်၊ ပျော်ရွှင်စရာနဲ့ အဆုံးသတ် ရမယ်နော်”
ညီမောင် ဗြုံးကနဲ ရယ်ပစ် လိုက်မိပါသည်။ ပြီးမှ ဣနြေ္ဒ ပြန်ဆည်ရကာ “ပြောပါ့မယ် အစ်ကိုလေးရယ်၊ အစ်ကိုလေး တစ်ယောက်တွင် မကဘူး၊ အားလုံး နားထောင်ရပါစေ့မယ်” ဟု ရယ်သံ မပျောက်သေးဘဲ ပြောခဲ့ပြီး တန်ဆောင်းမှ ထွက်ခဲ့ပါသည်။ ထိုညတွင် ညီမောင် အိမ်ပြန် မရောက်ပါ။ ဦးနှောက်ကို အရည်ဖျော်ရင်း ညီမောင် သူရာခန်းတွင် မိုးစင်စင် လင်းခဲ့ရပါသည် အစ်ကိုလေး။

x x x



ရှေးသရောအခါ ငယ်သူငယ် ချင်းသုံး ယောက်ရှိ လေသည်တဲ့။

တူတူလှ၊ ဆွေမြင့်နှင့် ၀င်းအောင် တို့ပင် ဖြစ်ပါသည် အစ်ကိုလေး။

တူတူလှသည် စက်ရှင် မင်းကြီး၏ သမီးဖြစ်ပြီး ရန်ကုန်မြို့ ချိပ်လမ်းတွင် နေသည်။ ဆွေမြင့်မှာ ကြေးတိုင် ၀န်၏ သားဖြစ်ကာ တက္ကသိုလ် ရိပ်သာလမ်း၌ စံမြန်းသည်။ ညီမောင် ၀င်းအောင် ကား ဒိသာ ပါမောက္ခကြီး ၏သား တေလေ ကလေး ဖြစ်၍ တက္ကသိုလ် ၀င်းခြံ အတွင်းတွင် ကြီးပြင်း ခဲ့ရသည်။ တူတူလှသည် သူမတူအောင် လှသော မိန်းကလေး ဖြစ်ကာ ဆွေမြင့်က အသရေ တင့်ပြီး ချစ်ချင့်စဖွယ် ယောက်ျား ရွယ်ကလေး ဖြစ်၍ ညီမောင်ကား ဆိုးပေတေသည့် နယ်ပယ်တွင် သတင်းပြောင်သည့် မင်းခေါင် ကလေး ဖြစ်ခဲ့ပါသည်။ သို့နှင့် ညီမောင်တို့ သုံးဦး အရွယ်ရောက်၍ တောင်တောင် မြောက်မြောက် တွေးတော တတ်လာ၏။

ထိုရော အခါတွင် ဆွေမြင့်က တူတူလှကို ၅၂၈မှ ၁၅၀၀သို့ ပြောင်းချစ် လိုက်ကာ တူတူလှကလည်း ဆွေမြင့်ကို မောင်ဟု ပြောင်းခေါ်လိုက်သည်။ ညီမောင့် ကိုမူ နှစ်ယောက် စလုံးက အတိုင်ပင်ခံ မင်းသား ကလေး မောင်ပုည အဖြစ် ခန့်အပ် လိုက်ပါသည်။ သို့သော် ညီမောင်ကား သက်တော် စောင့်လည်း လုပ်ရ၏။ မာတလိ လည်းဖြစ်ခဲ့၏။ ၀ိသုကြုံ တာဝန်လည်း ထမ်းဆောင်ရသည့် အခါ ရှိသေး၏။

တက္ကသိုလ်ဝင် သင်တန်းကို အသီးသီး အောင်မြင်ကြပြီးနောက် တက္ကသိုလ်သို့ ရောက်ကြသော အခါ ပြဿနာ တစ်ခုသည် ညီမောင်တို့ သုံးဦး သုံးဖလှယ်ကြားတွင် ပေါ်ပေါက်လာပါသည်။ ယင်းမှာ ဘ၀လှေခါး အသွယ်သွယ်တွင် မည်သည့် လမ်းကို ရွေးကြမည်နည်း ဟူသော ပြဿနာပင် ဖြစ်ပါ၏။ အထူးသဖြင့် ဤ ပြဿနာသည် ဘ၀ ခရီးကို ခေါင်းဆောင် လျှောက်ရမည့် ညီမောင်နှင့ ဆွေမြင့် တို့နှစ်ယောက် အတွက် တိုက်ရိုက် သက်ဆိုင် နေပါသည်။ ညီမောင်နှင့် ဆွေမြင့်ကား နှယ်နှယ်ရရ သူငယ်ချင်းများ မဟုတ်ကြ။ အမေရိကန် လူနီရိုင်းတို့ လုပ်လေ့ လုပ်ထ ရှိသကဲ့သို့ (Blood Brother) ခေါ် သွေးညီနောင်များ စစ်စစ်ဖြစ်ကြသည်။ လက်ကောက်ဝတ်တွင် သွေးဖောက်၍ သွေးချင်းနှောကာ သစ္စာ ဆိုခဲ့ကြသော သူငယ်ချင်းများ ဖြစ်ပါသည်။

သို့သော် တွေ့ကြုံဆုံကွဲ ဖြစ်မြဲ ဓမ္မတာကို ဤသူငယ်ချင်းများမှာလည်း မလွန် ဆန်နိုင်ကြပါ။ လူငယ်စိတ်တွေ ဖျောက်၍ လူကြီး ဦးနှောက်တွေနှင့် တွေး ကြသောအခါတွင် နှစ်ဦး သဘောတူ ကိုယ်ကြိုက်ရာ လမ်းကို ကိုယ်ထွင် ခဲ့ကြပါသည်။ ဆွေမြင့်က သူဝါသနာ ပါသော (Aero-Nautical Engineering) လေ ကြောင်း အင်ဂျင်နီယာ အတတ်ကို အင်္ဂလန်သို့ သွား၍ သင်မည်ဟု ဆုံးဖြတ်ပြီး ညီမောင်ကမူ တက္ကသိုလ် ပညာကို ဆုံးအောင် သင်ပြီးမှ စစ်ထဲဝင်မည် ဟူ၍ ဖြစ်ပါ သည်။ တူတူလှကမူ ယောက်ျား ဆိုသည်မှာ ကိုယ်လိုချင်သည့် အသက်မွေးဝမ်း ကျောင်းပညာကို ကိုယ့်ဘာသာဆုံး ဖြတ်ရသည်ဆိုကာ ကန့်ကွက်ခြင်း မရှိ၊ သဘော တူညီခဲ့ပါသည်။ တစ်ခုသာ ညီမောင့်ထံမှ ကတိတောင်း၏။ ဆွေမြင့်နှင့် တူတူလှတို့ အကြောင်း ပါပြီးလျှင် သူတို့နှင့် အတူ ညီမောင်လိုက် နေရမည် ဆိုပါသည်။ ညီမောင့်မှာ အူချာချာနှင့်သာ ရယ်ပစ်ရသည်ချည်း ဖြစ်၏။ သို့နှင့် ဘ၀ရှေ့ရေး အစီအစဉ် များကို ရေးဆွဲကြပြီးနောက် စတင် ကြိုးပမ်းကြရ၏။ ဤတွင် မမျှော်လင့်သော အချိုးအကွေ့ တစ်ခုနှင့် ဘွားခနဲ ရင်ဆိုင်ခဲ့ရပါသည်။

“၀င်းအောင် မင်းကတော့ အမြဲတမ်း ဥာဏ်ကျယ်ကလေး ဖြစ်ခဲ့လို့ အကြံပေးစမ်း ပါဦးကွာ။ ငါတော့ ဦးနှောက်ခြောက်ပြီ”

တစ်နေ့တွင် ဆွေမြင့်သည် ညီမောင့်ထံ ပေါက်လာပြီး စိတ်ပျက် လက်ပျက်ကြီး ပြောလိုက်၏။ ညီမောင်က ယုန်ပညာ ရှိဟန်ဖြင့် အကျိုး အကြောင်းကို မေးသော် ဆွေမြင့်က မျက်ရည်တွေ တ၀ဲဝဲနှင့် ဖြစ်သမျှကို လှစ်ဟလေသည်။ ဆွေမြင့်သည် အင်္ဂလန်တွင် (၇) နှစ်တာမျှ ပညာ သင်ရမည် ဖြစ်သည်။ ထိုမျှအထိ တူတူလှကို သူမခွဲနိုင်ဟု ဆိုသည်။ မိဘတွေကို တူတူလှနှင့် ပေးစားရန် ပြောသောအခါတွင် ငယ်ရွယ်သေး၍ မပေးစားနိုင်ဟု ငြင်းဆန်သည်ဟု သိရသည်။ တစ်ဖန် တူတူလှကို တီးခေါက်ကြည့်ပြန်သော် သူ့မိဘများက အခြား သူတစ်ယောက်နှင့် သဘောတူထားပြီး ဖြစ်၍ ခက်ခဲမည်မှာ မလွဲဟု အကြောင်း ပြန်သည်ဟု ဆို၏။

“ငါတော့ ဘယ်လို လုပ်ရမှန်း မသိပါဘူး သူငယ်ချင်းရယ်။ တူတူနဲ့ ဒီလောက်ထိ ခွဲပြီး သွားရမှာတော့ ငါမသွားချင်ဘူး။ ငါနဲ့ အတူ တူတူကို လက်ထပ်ပြီး ခေါ်သွား ချင်တယ်။ မသွားဘဲ ဘ၀ရှေ့ရေးကို ပစ်ပယ်လိုတဲ့ စိတ်လည်း ငါ့မှာ မရှိပါဘူး။ ငါတော့ ခေါင်း မီးတောက်နေပြီ သူငယ်ချင်း မင်းပဲ ကိုယ်ချင်း စာကြည့်ပါ”

ဆွေမြင့်က ကိုယ်ချင်းစာ ကြည့်ခိုင်းသော်လည်း ညီမောင့်မှာ ရည်းစားသနာ မရှိ၍ ရင်မှာခံစားမှု သိပ်မတွေ့မိ။ သို့သော် ဆွေမြင့်က ကြံစမ်းပါဦးဟု ဆို၍ ညီမောင် အကြံထုတ်ရပါသည်။ ရရှိသည် အကြံဥာဏ်ကိုလည်း တမုဟုတ်ချင်း မိနစ် မဆိုင်းဘဲ ဆွေမြင့်ကို ပြောပြရပါသည်။ ဆွေမြင့်ကား ညီမောင့် အကြံဥာဏ် များကို အကြွင်းမရှိ လက်ခံပြီး လိုက်နာပါမည် ဆို၏။ သို့ရာတွင် ပို့မည့်ပို့ ကူးတို့ ရောက်အောင် ပို့ပါဦးဟု သူငယ်ချင်းကို အပူ ကပ်ပါသည်။ သွေးညီမောင် ဆိုသည်မှာ အသက်ပင် ပေးကြရသည် မဟုတ်ပါလား။ ညီမောင် ခေါင်းညိတ် ရပြန်ပါသည်။

ညီမောင် ဥာဏ်ကျယ်လေး၏ လျှို့ဝှက် စစ်ဆင်ရေးကား ကြယ်စုံ ထွန်းပသည့် တန်ဆောင်မုန်း လပြည့်ညပင် ဖြစ်ပါ သည်။
မီးပုံးနီနီ ကလေးတွေ အိမ်ပြတင်းဝတွင် ချိတ်ဆွဲစ ပြုသည့် ညဥ့်ဦးယံ ကာလတွင် ညီမောင်၏ ဖိုဒ့်ဆီ ဒန်ကားကလေး သည် ချိ(ပ်)လမ်းတွင်းသို့ ညင်သာစွာ လှိမ့်ဝင်လာပြီး တူတူလှတို့ အိမ်အပြင် လမ်းမ နံဘေးတွင် အသာအယာ ထိုးဆိုက်လိုက်ပါသည်။ ကားထဲတွင် ညီမောင်နှင့် ဆွေမြင့်ပါ၏။ ဆွေမြင့်သည် စီးကရက် များကို စိတ်လှုပ်ရှားမှု ဒဏ်ကြောင့် နင်းကန်ဖွာရှိုက် နေရင်းမှာ “ဖြစ်မှ ဖြစ်ပါ့မလား သူငယ်ချင်းရယ်” ဟု စစ်မရောက်ခင်က မြားကုန်ချင် နေသည်။ ညီမောင်က မကြောက်ရန် ကြိမ်းကြိမ်းငေါက်ငေါက် ပြုလုပ် ပေးရသည်။ ဆွေမြင့်သည် သက်ပြင်းကိုသာ အခါခါချ၍ နေလိုက်၏။ များမကြာမီတွင် ညီမောင်၏ အစီအစဉ် အရ ဆလွန်းကား (၁၀) စီးခန့်မျှသည် လမ်းထဲသို့ တစ်ကားပြီး တစ်ကား မောင်းဝင်လာ ကြပြီး ညီမောင်တို့ကား အနီးတွင် ရှေ့ နောက် တန်းစီရပ်ထား လိုက်ကြပါသည်။

တစ်ဦးနှင့် တစ်ဦးကိုလည်း မီးဖွင့်၍ အချက်ပြ ကြပါသည်။ ထိုမော်တော်ကားများကို မောင်းလာကြသူများမှာ ညီမောင်၏ သူငယ်ချင်းများ ဖြစ်ကြပါသည်။ သူတို့ သည် ညီမောင်၏ မှာကြားချက် အရ သူကောင့်သားများ ဖြစ်ကြသည့် အလျောက် မိဘ၏ ကားများကို ဆွဲလာကြခြင်း ဖြစ်ပါသည်။ အားလုံး နေသားတကျ ဖြစ် လောက် သောအခါ ညီမောင်လည်း ကားပေါ်မှ ဟန်နှင့် ပန်နှင့်ဆင်းကာ တူတူလှတို့ အိမ်ဝင်းထဲ ၀င်ခဲ့ပြီး ဆင်ဝင်အောက်မှ နေပြီး တူတူလှနှင့် တွေ့လိုကြောင်း ထွက်မေးသူ တူတူလှ၏ မိခင်ကြီးကို ခွင့်တောင်းရသည်။

“အော် အေး သမီးရေ၊ ဟောဒီမှာ မောင်ဝင်းအောင် လာတယ်ဟေ့၊ ၀င်ထိုင်ပါ ဦးလားကွဲ့ မောင်ဝင်းအောင်”

“မထိုင်တော့ဘူး အန်တီ၊ တူတူလှ မိန်းကလေးတွေက မှာလိုက်တာကို ပြောပြီး ချက်ချင်းပြန်မလို့ပါ”

တူတူလှ ဆင်းလာသောအခါ ညီမောင်လည်း တူတူလှကို မျက်ရိပ်ပြပြီး ဆင်ဝင်တိုင်နှင့် ကွယ်နေသော မှောင်ရိပ်ကို ခေါ်ရ၏။
“တူတူ နင်ငါနဲ့ တစ်ခါထဲ လိုက်ခဲ့တော့”

“ဘာတွေ ပြောနေတာလဲဟ”

“နင့်ကို လာခိုးတာ”

တူတူလှသည် မျက်လုံးပြူးသွားကာ
“အို မဟုတ်တာ ဘယ်ဖြစ်မလဲ”

တူတူလှသည် အိမ်တွင်းသို့ လှည့်ဝင်မည် အပြုတွင် ညီမောင်လည်း ကြိုတင် စီစဉ်ထားသည့် အတိုင်း ကိုယ်နောက်တွင် ၀ှက်ယူလာသော စောင်ပါးနှင့် တူတူလှကို အုပ်လိုက်ကာ ပုခုံးပေါ် ထမ်းတင် လိုက်ပါသည်။ တူတူလှက ၀ူးဝူးဝါးဝါး အော်ကာ ရုန်းကန်၏။ ဤတွင် ညီမောင်လည်း ထိတ်ခနဲ ဖြစ်သွားတော့ သည်၌ တူတူလှကို ထမ်းရင်းက ခြံပြင်သို့ ပြေးထွက်ခဲ့မိပါ၏။ ထိုသို့ ပြေးထွက် အလာ၌ အိမ်ပေါ်ထပ် ပြတင်းပေါက်မှ မြင်လိုက်ဟန် တူသော တူတူလှ၏ အမေကြီးက “အမယ်လေး ကျွန်မသမီးကို လူခိုးပြေးလို့ ကယ်ကြပါဦးရှင်” သံကုန် အော်ပါလေသည်။ ညီမောင်လည်း ထူပူ သွားတော့သဖြင့် ဘာကိုမှ မစဉ်းစားနိုင် တော့ဘဲ ရပ်ထားရာ ကားထံသို့သာ အရောက် ပြေးခဲ့ရပြီး အဆင်သင့် ပွင့်နေသော ကားနောက်တံခါးမှ တူတူလှ၏ ကိုယ်ခန္ဓာ ကလေးကို ပစ်သွင်းလိုက်ပြီး နောက် ဒလကြမ်း မောင်းထွက်ခဲ့ပါ၏။

ထိုအခါ ညီမောင်၏ စူးရောက်သော အကြံအစည်အတိုင်း စောစောက ရပ်ထားသော ကားများသည်လည်း တစ်ပြိုင်တည်း စက်နှိုး ထွက်၍ အရပ်ရှစ်မျက်နှာ အနှံ့ မောင်းပြေးကြပါ၏။ ဤသည်မှာ နောက်မှ လိုက်လာသော ကားရှိလျှင် မျက်စိလှည့်ရန် ဖြစ်ပါသည်။ ညီမောင်မှာလည်း မည်မျှ သတ္တိကောင်းသည် ဖြစ်စေ ကာမူ မလုပ်ဖူးသော အလုပ်ကို စွန့်စား လုပ်ရသောကြောင့် တုန်တုန် ရီရီကြီး ဖြစ်၍ နေပါသည်။ ကားကို မောင်းထွက်ပြီးမှ ညီမောင်၏ ကားနှင့် ဆွေမြင့် ပါမလာသည် ကို သိရ၏။ မတတ်နိုင်ပါ။ ယခု အချိန်ကျမှ ပြန်ရှာ၍ မဖြစ်နိုင်တော့ သဖြင့် အခြားကား တစ်စင်းစင်းနှင့် ပါသွားလိမ့်မည်ဟု သက်သာရာ သက်သာကြောင်း တွေးလိုက်ရကာ ကားကိုသာ ဦးတည်ရာ စွတ်မောင်း နေမိပါ၏။

သို့မရပ်ဝံ့ဘဲ ကားကို မောင်းနေရာတွင် တူတူလှသည်လည်း စောင်ခြုံတွင်းမှ ထွက်ပြီး “နင် ငါ့ကို ခွေးကျင့်ခွေးကြံ ကြံတယ်ဟင်၊ သေချင်းဆိုး” ဟု ဆဲဆိုကာ ညီမောင်၏ မျက်နှာပါးပြင်တို့ကို နောက်မှ စိတ်ရှိလက်ရှိ ကုတ်ဆွဲပါလေသည်။ သွေးဖြာဖြာကျသည် အထိ ညီမောင် ကျိတ်မှိတ်ခံရပါ၏။ တူတူလှ၏ စိတ်ထဲတွင် ညီမောင်က သူ့ကို အဓမ္မ ခိုးလာသည်ဟု ထင်နေဟန် တူပါသည်။ ညီမောင်မှာလည်း မောဟိုက် နေသဖြင့် ဘာတစ်ခုမှ မဖြေရှင်းမိ။

ညီမောင်က ကားကို မြို့တွင်း လှည့်လည်မောင်းနေစဉ် အခြားကား များကို ရဲများ တား၍ ရှာဖွေသည်ဟု နောက်မှသိရ ပါသည်။
“ကဲလေ ဖြစ်မိပြီးမှတော့ မထူး ပါဘူး။ ဒီလိုကားကို တစ်ချိန်လုံးလျှောက် မောင်းလို ဘယ်ဖြစ်မလဲ။ သွားချင်တဲ့ နေရာကိုသာ သွားတော့”

တူတူလှက ကြမ္မာကို ရိုးမယ်ဖွဲ့၍ ညည်းတွား ရှာတော့မှပင် ညီမောင်လည်း ကြိုတင် စီစဉ်ထားသည့် အိမ်သို့ ပြန်မောင်းခဲ့ရ၏။ ထိုအိမ်ကျမှပင် မျက်နှာ သေကလေးနှင့် ထိုင်စောင့် နေသော ဆွေမြင့်ကို တွေ့ရပါသည်။ တူတူလှလည်း အကြောင်းစုံကို ရိပ်မိတော့ သဖြင့် ဆွေမြင့်၏ ကျောပြင်ကို ဗျောတင်၍ တီးပါလေ၏။ သူ့ကောင့်သား ဆွေမြင့်ကား ထိုအခါကျမှ သွားဖြဲတော်ရ၍ လာ၏။ မုန်တိုင်းများ ငြိမ်သက်သွားသော အခါတွင် တူတူလှက ညီမောင်၏ မျက်နှာမှ သူ့လက်သဲရာများကို ဆေ ထည့်ပေး၏။

“အမယ် နာမနေနဲ့ ဒါတောင် သနား လို့ နို့မို့လား တူတူက မျက်လုံးပါ ကုတ်ဆွဲ ပစ်လိုက်မလို့”
ဆွေမြင့်ရော တူတူလှပါ ညီမောင်၏ ဖြစ်အင်ကို ကြည့်ကာ ရယ်ကြပါသည်။ ညီမောင်ကား မရယ်မိဘဲ ငိုင်တွေတွေဖြစ် ၍နေပါ၏။

x x x

နောက်တစ်နေ့တွင် သတင်းစာများ၌ ညီမောင်၏ သတင်းသည် ၆ လိုင်း စာလုံးကြီးများနှင့် ထိပ်ဆုံးက ပါလာပါသည်။ ညီမောင်က တူတူလှကို ခိုးသွား သတဲ့၊ မျက်နှာကြီး သားသမီးတို့၏ စွန့်စားခြင်း ဇာတ်လမ်းတဲ့ ညီမောင်၏ ဓာတ်ပုံနှင့် တူတူလှတို့၏ ဓာတ်ပုံ တို့လည်း ပါလိုက်သေးသည်။ ထိုသတင်းကြောင့် ညီမောင်မှာ ရယ်ရမလို ငိုရအခက်နှင့် သက်တက်တက်ကြီး ဖြစ်၍ နေရပါသည်။ ကျော်တော့ လှေသူကြီး သက်သက်မို့ ညီမောင် တစ်ယောက်တည်း ဒေါသ ဖြစ်မိသေးသည်။ ဆွေမြင့်က “အဟက်ဟက်” ဟု ပဲ့တင် ထပ်သည်။ တူတူလှက “အဟိဟိ” ဟု ကလိ၏။ ညီမောင့်မှာသာ နုံးချိချိ ဖြစ်ရပါသည်။ အိမ်ထဲက အိမ်ပြင်လည်း မထွက်ရဲချေ။ ပြန်လည် အဖမ်းခံရမှာလည်း ကြောက်သေး၏။ ညားခါစ ချစ်သူတို့ကား ညီမောင်၏ ရှေ့မှောက်တွင် ပျော်လို့ရွှင်လို့၊ ကြည်နူးလို့ ထမင်းများပင် တစ်ယောက်ကို ခွံ့ကျွေးလိုက်ကြသေး၏။ ညီမောင့်မှာမူ လက်သဲရာတွေက မြက်ကနဲ မြက်ကနဲ နာကျင် နေရပါသေး၏။ ရက်သတ္တပတ် ခန့်ကြာ ညောင်း၍ လာသောအခါတွင် တည်းအိမ်ရှင်၏ တိုက်တွန်းချက် အရ တရားဝင် ဖြစ်သွားရန် တိတ်တဆိတ် ထွက်ပြီး ရုံးတက်လက်မှတ် ထိုးကြရန် စီစဉ်ကြရပါသည်။ ဘေးရန် ကင်းရှင်းလောက်သည့် တစ်နေ့တွင် ညီမောင်တို့လည်း အသိ သက်သေများပါ ခေါ်၍ ရုပ်ဖျက်ခါ ရုံးတော်သို့ ထွက်၍ လာကြ၏။ စာချုပ် စာတမ်းများလည်း ညီမောင်တွင် အဆင်သင့် ပါ၏။ ရုံးရောက်၍ သက်ဆိုင်ရာ တရားသူကြီးက အကျိုးအကြောင်း မေးသော အခါ ညီမောင်လည်း လက်ထပ်ရန် လာကြောင်း သွက်လက်စွာ ပြောလိုက်ရပါသည်။

“မောင်ရင့် နာမည်က”

“မောင်ဝင်းအောင်ပါ အန်ကယ်လ်”

“အဖေ အမေတွေကကောကွယ်”

ညီမောင်လည်း မိဘ အမည်ကို ဂုဏ်ယူစွာ ပြောလိုက်ပါသည်။ ထိုအခါ တရားသူကြီးသည် အံ့သြသလို ဖြစ်၍ သွားပြီးမှ “မင်း အဖေနဲ့ အန်ကယ်ဟာ ငယ်သူငယ်ချင်းပေါ့ကွယ်။ အင်မတန် ခင်ကြတာ။ ခုလို သိရတာ ၀မ်းသာသဟေ့” ဟု ပြောပြီး လက်ဖက် ရည်များပင် တည်ခင်း ဧည့်ခံလိုက်သေး၏။ ညီမောင်တို့ မှာမူ လက်မှတ် မထိုးမီ ပုလိပ် ဖမ်းမိသွားမည် ကိုစိုး၍ ဖင်တကြွကြွ ဖြစ်၍ နေပါသည်။ တရားသူကြီးမင်းမှာလည်း စာချုပ်ကိုပင် ယူမဖတ်သေးဘဲ စကားတွေ ဖောင်ရင်း အလုပ် ရှုပ်နေပါသည်။ မကြာမကြာ ကပ်လျက် အခန်းငယ် ကလေး အတွင်းဝင်၍ သွားကာ လုပ်လက်စ အလုပ်များကို စီမံခန့်ခွဲ လိုက်သေး၏။ မိနစ် အနည်းငယ်ကြာ သွား၍ ကုလားထိုင် ပြန်ထိုင်သောအခါ တရားသူကြီး မင်းကို ညီမောင်က လာရင်း ကိစ္စ လောဆော်မည်ပြုရာ နောက်ဖက်ဆီမှ ဗြုံးကနဲ တွန်းဖွင့် သံကြားရသဖြင့် ခေါင်းနားပန်းကြီးစွာ လှည့်ကြည့် လိုက်မိပါ၏။

ဤတွင် ညီမောင်၏ ဖခင်ကို မမျှော်လင့်ဘဲ ဘွားကနဲ တွေ့လိုက်ရပါသည်။ ဖေဖေသည် ဒေါသဖြင့် နီမြန်းလျက် ရှိသော မျက်နှာဖြင့် ညီမောင့်ထံ လျှောက်လာကာ “ဟင် အဖေ့နာမည် ဖျက်ဦးကွာ။ ငယ်ငယ်ရွယ်ရွယ်နဲ့ မိန်းမယူ ချင်ဦးကွာ”ဟု ကြိမ်းမောင်းကာ ညီမောင့်ကို လက်သီးနှင့် ထိုးပါလေ၏။ ညီမောင်မှာ လူကြားထဲတွင် ရှက်လှ၍ မျက်ရည်များပင် ကျမိပါ သည်။ ဖေဖေ့ထံ တိတ်တဆိတ် တယ်လီဖုန်း လှမ်းဆက်၍ အကြောင်းကြားသော တရား သူကြီးအားလည်း စိတ်ထဲမှ ဒေါသပုန်ထ နေမိပါသည်။

“မလုပ်ပါနဲ့ အန်ကယ်ရဲ့ ၀င်းအောင်ကို မလုပ်ပါနဲ့”

အံ့အား သင့်နေသော ဆွေမြင့်တို့က အကျိုးအကြောင်း ရိပ်မိ၍ ၀င်ဆွဲမှပင် ညီမောင် ချမ်းသာရာ ရပါသည်။ ပြီးမှ ဆွေမြင့်က ရှင်းပြ၏။ သို့ကျမှ ဖေဖေလည်း “မင်းတို့ဟာကလည်း ရှုပ်ပါ့ကွာ” ဟု ရှက်သံကြီးနှင့် ပြောလိုက်ကာ နေရာမှ ချာကနဲ လှည့်၍ သွားပါသည်။ တံခါးဝ ရောက်မှ ပြန်လှည့်ကာ “မင်း အိမ်ပြန်ခဲ့တော့” ဟု ရယ်ချင်ဟန် ရသော မျက်နှာနှင့် အမိန့် ပေးသွားပါသည်။ ညီမောင် တို့တတွေမှာ ဖေဖေ ထွက်ခွာ သွားပြီးမှ ငိုအားထက် ရယ်အားသန် ဖြစ်ကြရ၏။

ညီမောင့်မှာကား အဖေ့ လက်သီးကြောင့် ဒဏ်ရာဒဏ်ချက်တွေ ဆထက်ထမ်းပိုး တိုး၍ ရသွားပြန်ပါလေသည်။ ထိုသည့်နောက် တစ်ပတ်လုံးလုံး ညီမောင် အိမ်ပြန်ရောက်သော အခါ တူတူလှ၏ အမေစက်ရှင် မင်းကြီးကတော်သည် ညီမောင်တို့ အိမ်ရှေ့သို့ သူ့ကားကြီးနှင့် ပေါက်ချလာကာ“ဟဲ့ အမျိုးယုတ် ကလေးရဲ့ မိမဆုံးမ ဖမဆုံးမ ကလေးရဲ့၊ နင့်ကြောင့် ငါ့သမီး ဒီလို ဖြစ်ရတာဟဲ့။ သတ္တိရှိရင် အိမ်ထဲက ထွက်ခဲ့စမ်းဟဲ့” ဟု စသဖြင့် အချိန်မှန် လာ၍လာ၍ ဆဲရေးပါသည်။ ညီမောင်မှာ အိမ်ထဲကလည်း မထွက်ဝံ့၊မိဘ တွေကလည်း ညီမောင့်ကြောင့် အပြော ခံရသည်ဟု အတွင်းမှ ဖိကြိမ်းခံရသဖြင့် လောင်မီးကျလျက် နတ်တို့စက်နှင့် ဖူးစာ ဆုံ၍ နေခဲ့ရပါသည်။

ခြောက်လမျှ ကြာ၍သွား၏။
ဆွေမြင့်တို့လည်း ယောက္ခမအိမ်ပေါ် အစွေ့သား ရောက်၍နေ၏။ ခမည်းခမက်တို့ဟိုဘက်သည်ဘက် ရွှေလမ်း ငွေလမ်း ခင်းကာ အဆင်ပြေ အခြေကျ၍ “သားရေ သမီးရေ” ဖြစ်ကုန်နေကြပြီ။ သို့သော် ညီမောင်ကိုကား အိမ်သို့ အ၀င်မခံကြတော့ချေ။ ဆွေမြင့်နှင့် တူတူလှသည် ညီမောင်ကို တွေ့လိုလျှင် လူကြီးတွေ မသိအောင် ခိုး၍ တွေ့ကြရလေသည်။ ပြီးနောက် ဆွေမြင့်၏ ဆန္ဒအတိုင်း နှစ်ဖက်မိဘက အင်္ဂလန်သို့ လွှတ်ရန် စီစဉ် ကြလေသည်။ တူတူလှလည်း လိုက်ပါမည် ဖြစ်၏။ မသွားမီ တစ်ရက်တွင် သူငယ်ချင်း သုံးယောက် ပြန်ဆုံမိကြပါသည်။

“မင်းကို ဒို့တစ်သက်လုံး မမေ့တော့ဘူး။ ၀င်းအောင် ပထမဦးဆုံး မွေးလာတဲ့ ဒို့သားကလေးကို ၀င်းအောင်လို့ မှည့်မယ် ကြားလား”
ဤသို့ နှုတ်ဆက်ကာ အိမ်မှ ဆင်းသွား ကြသော မောင်နှံစုံကို ကြည့်ကာ ညီမောင် မျက်ရည်ဝဲ ခဲ့ရပါသည် အစ်ကိုလေး။
ပြီးတော့လည်း ထိုတကဏ္ဍသည် ညီမောင်၏ ဘ၀မှ မေ့ပျောက် ပစ်ရမည့် ကဏ္ဍဟု ညီမောင် စွဲမှတ် ယူခဲ့ရပါသည်။ ယခင်တုန်းက ဆိုလျှင် တန်ဆောင်ပွဲတွေ ဆို လျှင် ရှေ့ဆုံးမှ ညီမောင် ပါခဲ့သည်ချည်း ဖြစ်ပါသည်။ ထိုအဖြစ်အပျက် ဖြစ်ပြီးသည် မှစ၍ ညီမောင် တန်ဆောင်တိုင်တွေကို မေ့ပစ်ခဲ့ပါသည် အစ်ကိုလေး။

x x x

ယခု တစ်ဖန်ကြာကြီးကြာမှ အစ်ကိုလေး၏ ဖိတ်ကြားမှုကြောင့် တန်ဆောင်တိုင်ပွဲ ဆင်နွှဲမိမှ အဆွေဟောင်းတို့ နှင့် ပြန်ပြောင်း အကြောင်း ဆုံခဲ့ရပါသည်။ အင်္ဂလန် တွင် ပညာသင်ပြီး အင်္ဂလန်တွင်ပင် အလုပ်လုပ်ကာနေခဲ့ရာမှ ဆွေမြင့်တို့ ပြန်ရောက် ကြောင်းကို ညီမောင် သိပြီး ဖြစ်ခဲ့ပါသည် အစ်ကိုလေး။ သို့သော် ညီမောင် သူတို့ထံ သွားမလည်ခဲ့ပါ။ အစ်ကိုလေး မြင်သည့်အတိုင်း ဆွေမြင့်တို့ မိခင်ကြီးများက ယခုထက်ထိ ညီမောင်ကို ခွင်မလွှတ် နိုင်ကြသေးသော အချက်သည်လည်း တစ်စိတ်တစ်ဒေသ ပါဝင်ခဲ့ပါသည်။

ထို့ပြင် ညီမောင်၏ ပုံပြင်သည် ဤမှာပင် ပြီးဆုံးပါသည် အစ်ကိုလေး၊ အစ်ကိုလေး ကြားလိုသည့် အတိုင်း ပျော်ရွှင်စရာတွေသာ ဖြစ်ပါပေသည်။ ညီမောင်တို့ မိုက်ရူးရဲ မဖွယ်မရာ စွန့်စား ခဲ့ကြပုံမှာလည်း ပြုံးမိစရာ ဖြစ်ပါသည်။ ညီမောင်၏ စိတ်ကူး ဥာဏ်သည် မည်မျှ ဇာတ်လိုက် ဆန်ခဲ့သည် ကိုလည်း အစ်ကိုလေး သိရပါပြီ။ ညီမောင် ရွှေဥာဏ်တော် စူးရောက်လွန်း လှ၍လည်း မိဘတစ်တွေက ညီမောင်ကို ယခုထိ ခွင့်မလွှတ်နိုင် ကြခြင်း ဖြစ်ပါသည်။ ထို့ပြင် ၀န်ခံစရာ တစ်ခုလည်း ရှိနေပါသည်။

ညီမောင့် ကိုယ်ကိုလည်း ညီမောင် ယခုထက်ထိ ခွင့်မလွှတ်နိုင်ခဲ့ပါ အစ်ကိုလေး။ ကိုယ်မခူးရက် မပန်ရက်ဘဲ အရိပ် တကြည့်ကြည့် မြတ်နိုးခဲ့ရသည့် ပန်းတစ်ပွင့်ကို တစ်ပါးသူအား ရက်ရက်ရောရော ခူးပေးရက်သော လူမိုက်မျိုးသည် ကမ္ဘာမှာ ညီမောင် တစ်ယောက်သာရှိပါသည် အစ်ကို လေးရေ။ ပြုံးပေဦးတော့ အစ်ကိုလေး။

ညီမောင်၏ ပုံပြင်တွင် ပြုံးစရာ အကွက်တွေ တစ်ပုံတစ်ပင်ကြီး ရှိပါသည်။ သကာဖုံးသည် အသဲနာ တမာတုံး ဘ၀ကိုလည်း အစ်ကိုလေး သနားပြုံး ပြုံးလိုက ပြုံးပါချေပြီ။ လွန်လေပြီးသော အတိတ်ကို ပြန် သဏ္ဍာန် ဆောင်ခြင်းမျှသာ ဖြစ်ပါသည်။ သို့ရာတွင် ၀န်ခံစရာ တစ်ခုကား အကယ် ပင် ကျန်ပါသေး၏။

ထိုအတိတ်ကြောင့် ပင်လျှင် သည်တန်ဆောင်တွင် ညီမောင်သည် အထီးကျန် ဘ၀တွင် ရှိနေဆဲဖြစ်ခြင်း ဖြစ်ပါသည် အစ်ကိုလေး။

ဝင်းဦး

ပေဖူးလွှာမဂ္ဂဇင်းမှတဆင့်ကူးယူဖေါ်ပြပါသည်။